Енгил вазнда UFC чемпиони 7 январь куни аёлларга нисбатан зўравонлик ишлари бўйича судга келиши шарт, у ерда Жоржина Узкатеги билан ажрашиш жараёнининг биринчи йиғилиши бўлиб ўтади.

Ушбу ихтисослаштирилган судда тинглов ўтказилишига 18 ноябрь куни Узкатеги томонидан берилган ариза сабаб бўлган. Унда у эрини (ҳозирча расман ажрашмаган) калтаклаш ва уйдаги зўравонликда айблаган.

Испания ОАВнинг хабар беришича, тахмин қилинаётган воқеа содир бўлган вақтда эр-хотин аллақачон ажрашиш жараёнида бўлган, унинг ташаббускори эса Илия эди. Можаронинг кескинлашишига уларнинг бир ярим ёшли қизи ким билан қолиши кераклиги ҳақидаги баҳс сабаб бўлган: Узкатеги Топурия билан танишгунга қадар яшаган АҚШга қайтиб, қизини у ерга олиб кетмоқчи бўлган. Топурия аввалги муносабатларидан ўғли билан бўлгани каби болани ўзида қолдирмоқчи эди. Айнан қизга васийлик қилиш масаласи судда биринчи ўринда ҳал қилинади. 

Жоржина Узкатеги, шунингдек, шарҳловчи ва машҳур подкаст бошловчиси Жо Роганни туҳматда айблаб, судга берди. Ушбу айбловнинг сабаби шундаки, Роган эфирда Жоржинанинг акаси билан сунъий интеллект ёрдамида қайта ишланган фотосуратини кўрсатган, унда акасининг юзи қора танли британиялик репернинг юзи билан алмаштирилган ва бу аёлга нисбатан ёқимсиз сўзлар ва айбловлар билан бирга келган. Бу Роган мухлисларининг Узкатеги ижтимоий тармоқларига “бостириб” кирган ҳолда ҳақорат қилиб, ўлим билан таҳдид қилишига сабаб бўлган.

Илия Топурия ва Жоржина Узкатеги тўрт йил олдин танишлариникида ўтказилган зиёфатда танишган. 2024 йилда улар турмуш қуришди, ўша йили уларнинг қизи дунёга келган. Бизнес бошқаруви бўйича бакалавр дипломига эга бўлган Узкатеги Топурия билан танишган пайтда АҚШда қуёш энергияси соҳасида ишлайдиган учта компанияга эгалик қилган. Тўйдан кейин у Топурия номи билан боғлиқ барча бизнесни бошқаришни ўз зиммасига олган, шунингдек, унинг шахсий бренди билан шуғулланган.

• MMA
• UFC
• zo‘ravonlik