Сурхондарё вилояти Денов туманидаги 9 ойлик чақалоқнинг вафоти юзасидан вилоят прокуратураси Xabardor.uz'га қўшимча маълумот берди.
Унга кўра, фуқаро Д.Алиқулованинг фарзанди тиббиёт бирлашмасида вафот этганлиги ҳолати юзасидан Денов тумани прокуратураси томонидан терговга қадар текширув ҳаракатлари олиб борилган.
Терговга қадар текшириш давомида, боланинг ўлими сабабларини аниқлаш мақсадида судга оид тиббиёт экспертизаси ҳамда хизмат текширувлари ўтказилиб, хулосалари олинган.
Натижасига кўра, бирор-бир шахснинг ҳаракатларида жиноят таркиби аниқланмаганлиги сабабли, Ўзбекистон Республикаси ЖПКнинг 83-моддаси 2-бандига асосан жиноят иши қўзғатишни рад этиш ҳақида қарор қабул қилинган.
“Фуқаро Д.Алиқулованинг видео мурожаатида келтирилган янги важларни ўрганиш бўйича ушбу қарор туман прокурори томонидан бекор қилиниб, ҳозирда қўшимча терговга қадар текширув ҳаракатлари олиб борилмоқда.
Иш ҳужжатлари бўйича қўшимча далил ва илтимосномалар бўлса, туман прокуратурасига тақдим этиш, мазкур жавобдан норози бўлган тақдирингизда юқори турувчи прокурорга шикоят қилиш ҳуқуқингиз борлиги тушунтирилади”, – дейилади вилоят прокуратураси хабарида.
Эслатиб ўтамиз, жорий йилнинг 8 февраль санасида Денов туманидаги тиббиёт бирлашмасига 9 ойлик чақалоқ тез ёрдам машинасида олиб келиниб, 9 февраль санасида вафот этган эди.
31°
Кечаси 18°
