Фуқаролик ишлари бўйича Жиззах туманлараро судининг 23.04.2024 йилдаги қарздор Халилов Жаҳонгирдан ундирувчи Бекжонова Хуршиданинг фойдасига 2016 йилда туғилган бир нафар фарзандининг моддий таъминоти учун иш ҳақи ва бошқа даромадларининг 1/4 қисми миқдорида алимент ундириш тўғрисидаги ижро ҳужжати бюронинг Шароф Рашидов туман бўлими иш юритувига 05.06.2024 санасида келиб тушган.

Ижро ҳаракатлари давомида қарздорнинг мол-мулкларини аниқлаш мақсадида тегишли идора ва ташкилотларга сўров хатлари юборилган ва қарздорнинг Ўзбекистон Республикасидан чиқиш ҳуқуқлари вақтинча чекланган.

Давлат ижрочиси томонидан қарздорнинг қарздорлиги ҳисоб-китоб қилинганда 01.07.2025 йил ҳолатига кўра, 14 460 000 сўмни ташкил қилган.

Қарздорликни ундириш мақсадида қарздор Халилов Жаҳонгир ижро ҳужжатида ва доимий яшаш жойларида аниқланмаганлиги сабабли, давлат ижрочиси томонидан муқаддам унга нисбатан қидирув эълон қилинган.

Олинган тезкор маълумотларга асосан, қарздор Ғаллаорол туманидаги тўйхонада хонандалар сафида хизмат қилаётганлиги аниқланади. Шундан сўнг, ходимлар тўй тугашини эҳтиёткорлик билан кутиб, хизматни якунлаганидан сўнг фуқаро Халилов Жаҳонгирни қўлга олган.

Ҳозирда унга нисбатан ижро ҳаракатлари давом эттирилмоқда.

• Жиззах
• МИБ
• hujjat
• qarzdor