Жорий йилнинг 9-12-январ кунлари Ўзбекистонда ҳаво ҳарорати кескин пасайиб, -23 даражагача тушиши мумкинлиги эълон қилинди. Аномал совуқ кириб келиши эълон қилингандан сўнг, мактаб ва олий таълим муассасаларида таътил вақтлари узайтирилди.

“Юксалиш” умуммиллий ҳаракати мазкур об-ҳаво шароитидан келиб чиқиб, бир нечта таклиф билан чиқди.

Хусусан, агар ходимларнинг иш жойида бўлишига эҳтиёж бўлмаса, улар онлайн ишлашига рухсат берилиши керак. Пандемия бундай форматда ҳам берилган вазифаларни самарали бажариш мумкинлигини кўрсатди. Қолаверса, бу йўлларни тирбанд қилмасдан, қор ва музлардан тозалаб олинишига шароит яратади.

“Шунингдек, барча иш берувчилар — ҳам давлат, ҳам хусусий сектор иш жараёнларини ташкил этишни чуқурроқ кўриб чиқишлари керак. Меҳнат шароитлари билан танишиб чиқиб, ходимларни қулай ҳарорат режими билан таъминлаши керак.

Иш соатларини, айниқса, очиқ ҳавода ишлайдиганлар учун қисқартириш мақсадга мувофиқ. Имкон қадар ходимлар учун иссиқ ичимликлар ташкил қилиш, совуққотиш ҳолатларининг олдини олиш учун танаффус бериш ёки ўрин алмаштириш ҳам фойдадан холи бўлмайди”, – дейилади хабарда.

Йирик савдо ва аҳолига хизмат кўрсатиш марказларида иссиқ чой таклиф қилинишига ҳам тўхталинди.

Жамоат транспортининг узлуксиз ҳаракатланишини таъминлаш кераклиги таъкидланди. Чунки, ноқулай об-ҳавода йўлларда енгил автомобиллар сони кескин камаяди.

“Юксалиш” умуммиллий ҳаракати барча ўзбекистонликларнинг мазкур шартоитда бир-бирларига ёрдам беришга чақирган.

“Муҳими, беъетибор бўлмайлик, қишнинг совуқ кунларида илиқлик улашиб, бир-биримизга ёрдам берайлик.

Маҳаллангиздаги ёлғиз кекса қўшнилар, кўп болали оилалар, фарзандини ёлғиз тарбиялаётган оналардан хабар олинг. Улардан иситиш тизими, электр, газ борлигини сўранг? Балки кимгадир ўтин ёки кўмир керакдир? Иссиқ кийимлари йўқдир. Ўзингизда борини улар билан ҳам бўлишинг. Шахсий автомобилда ҳаракатланганда ҳам бир манзилга борувчи йўловчиларни олиб кетинг” – дейдилган хабар сўнггида.

• Об-ҳаво
• Qish mavsumi
• Yuksalish