Маълумки, абитуриентларнинг ОТМга кириш учун тегишли ҳужжатларни онлайн топшириш жараёнида битирувчиларнинг паспорт (ID карта) маълумотларини Абитур электрон дастурига киритиш талаб этилади.

Шунинг учун 16 ёшга тўлган ҳар бир битирувчи ўз вақтида паспорт (ID карта) олиши зарурлигини эслатиб ўтилмоқда.

Ушбу жараёнда битирувчиларга янада қулайлик яратиш мақсадида Мактабгача ва мактаб таълими вазирлигининг электрон маълумотлар базаси Билим ва малакаларни баҳолаш агентлигининг Абитур электрон дастури билан интеграция қилинган.

Бугунги кунга қадар жорий ўқув йилида мактабларни тамомлаётган 450 мингдан ортиқ ўқувчининг 16 ёшга тўлган 23 минг (5,1 фоизи) нафари паспорт (ID карта) олмаганлиги сабабли уларнинг паспорт маълумотлари электрон базага ҳозирча киритилмаган.

“Ҳурматли ота-оналар, азиз битирувчилар!

Фарзандингизнинг Конституциявий ҳуқуқидан фойдаланган ҳолда, ўз вақтида паспорт (ID карта) олишини таъминлашингизни, мактаб маъмуриятидан эса битирувчиларнинг паспорт (ID карта) маълумотларини электрон базага киритиб, уларни келгусида олий таълим муассасаларига ҳужжат топширишида зарур кўмак беришингизни сўраймиз.

Маълумот учун: Паспорт (ID карта) олиш учун ҳудудий ички ишлар органларининг Миграция ва фуқароликни расмийлаштириш бўлимлари ва Давлат хизматлари марказларига мурожаат этишлари зарур”, – дея ёзмоқда Мактабгача ва мактаб таълими вазирлиги матбуот хизмати.

• Maktabgacha va maktab ta'limi vazirligi
• Мурожаат
• Ўқувчи
• Паспорт