Президент Шавкат Мирзиёев фармони билан Корея Республикасининг Инчхон шаҳрида ўтказилган “FIRST Global Challenge” халқаро робототехника мусобақасида жаҳон чемпиони бўлган Ўзбекистон терма жамоаси вакиллари давлат мукофотлари билан тақдирланди. Жамоа дунёнинг қарийб 190 та мамлакати ёшлари иштирок этган мусобақада рекорд натижага эришган.

Фармонга мувофиқ, робототехника бўйича Ўзбекистон терма жамоаси бош мураббийси Зиёдулла Бўтахонов “Содиқ хизматлари учун” медали билан мукофотланди.

Терма жамоа сардори Иброхим Саломов, техник мураббий Абдуллох Абдужабборов ҳамда жамоа аъзолари Шохрухбек Акбаров, Акбаршох Косимов, Аюбхон Мирахмедов, Умарбек Пардаев, Шукрулло Содиқов, Махкамбек Тешабаев, Жасурбек Тожиқўзиев, Баходир Урманов ва Хондамир Урманов “Келажак бунёдкори” медали билан тақдирланди.

Шунингдек, терма жамоа менежерлари Сафина Тешабаева ва Ҳасанхон Юсупхўжаев ҳам “Келажак бунёдкори” медали билан мукофотланди.

Фармонда жамоа вакилларининг халқаро миқёсдаги ютуғи, мамлакат нуфузини оширишга қўшган ҳиссаси ҳамда ёшларни илм-фан, илғор технологиялар ва инновацияларга жалб этишдаги фаолияти эътироф этилган.