Олий суд Раёсати фуқаролик ишлари бўйича судларда меҳнат низоларини кўришга ихтисослашган судьялар корпусини шакллантириш тўғрисида қарор қабул қилди. Унга кўра, 2026 йил 1 августдан бошлаб фуқаролик ишлари бўйича судларнинг мавжуд штат бирликлари доирасида меҳнат низоларини кўришга ихтисослашган судьялар фаолияти йўлга қўйилади. Қарорга мувофиқ: Олий суднинг Фуқаролик ишлари бўйича судлов ҳайъатида — 4 нафар; Қорақалпоғистон Республикаси суди, вилоятлар ва Тошкент шаҳар судларида — 3 нафардан; Айрим туманлараро ва шаҳар судларида эса 1 нафардан 2 нафаргача меҳнат низоларига ихтисослашган судьялар фаолият юритади.

Шунингдек, 2026 йил 1 августдан кейин судларга келиб тушган меҳнат низоларига оид аризалар мазкур ихтисослашган судьялар ўртасида тақсимланади. 2026 йил 31 июлгача келиб тушган, шу жумладан иш юритувига қабул қилинган ишлар эса аввалги тартиб асосида кўриб чиқилиб, якунланади.