Мўғулистонда мамлакат тарихидаги энг қаҳратон қишда 5 миллионга яқин чорва моллари ҳалок бўлди. Бу ҳақда “CНН” нашри хабар берди.

Халқаро Қизил Хоч ташкилоти Мўғулистоннинг чорвачиликка ихтисослашган ҳудудларидаги фавқулодда вазият ҳақида хабар берган. Унга кўра, совуқда музлаб ҳалок бўлган чорва моллари сони 4,7 миллиондан ошади. Ушбу йўқотиш ортидан мамлакат озиқ-овқат таъминотида жиддий муаммолар келиб чиқиши кутилмоқда. Мўғулистон иқлимига хос совуқ қиш ҳароратнинг кутилмаганда кескин пасайиши ва ҳудудларда қисқа муддатда жуда қалин қор ва муз қатламлари ҳосил бўлиши билан характерланади. Музлар яйловларни тўлиқ қоплайди. Оқибатда совуқ шароитда емишсиз қолган чорва ҳалок бўлади.

Бугунги кунда Мўғулистонда чорвадор фермерлар сони 300 000 дан ошади. Бу хўжаликлар асосан, қорамол, эчки ва отлар етиштириш билан шуғулланади.

Мўғулистон нашрлари берган маълумотга кўра, ноябрь ойидан бери камида 2250 чўпон оиласи чорва молларининг 70 фоиздан кўпроғини йўқотган. Ҳозирда 7000 дан ортиқ чорвадор фермер оилалари чорвасини боқиш учун етарли озиқ-овқат захирасига эга эмас.

• Чорвачилик
• монголия