Қозоғистоннинг Манғистов вилоятида ўқув-жанговар машғулотлар вақтида 19 нафар ҳарбий хизматчи Каспий денгизида оқимга тушиб кетди. Ҳодиса оқибатида 9 нафар ҳарбий ҳалок бўлгани маълум қилинди.

Қозоғистон Мудофаа вазирлиги маълумотига кўра, воқеа 24 сентябрь куни ҳарбий хизматчилар Каспий денгизи соҳилида ўқув-жанговар вазифаларни бажараётган пайтда юз берган. Метеорологик шароитнинг кескин ёмонлашиши ва шамолнинг кучайиши оқибатида ҳарбийлар денгизга оқиб кетган.

Ҳозирга қадар уч нафар ҳарбий қутқарилган. Улардан бири тиббий ёрдам кўрсатиш учун шифохонага ётқизилган. Қолган ҳарбийларни қидириш ишлари давом эттирилмоқда.

Қидирув-қутқарув оператсиясига Қозоғистон Ҳарбий-денгиз кучлари, Фавқулодда вазиятлар вазирлиги, авиатсия ва бошқа тегишли хизматлар жалб этилган. Воқеа жойига зарур куч ва воситалар юборилган.

Ҳодисанинг барча тафсилотларини аниқлаш ҳамда қидирув-қутқарув ишларини мувофиқлаштириш учун Қозоғистон Мудофаа вазирлиги комиссияси воқеа жойига йўл олган. Комиссияга мудофаа вазири, авиатсия генерал-лейтенанти Даурен Косанов раҳбарлик қилмоқда.

Ҳарбий хизматчиларнинг ҳалок бўлиши юзасидан жиноий иш қўзғатилган. Мазкур иш доирасида тезкор-тергов гуруҳи тузилган.

Қозоғистон Мудофаа вазирлиги ҳалок бўлган ҳарбийларнинг оила аъзолари ва яқинларига ҳамдардлик билдириб, марҳумларнинг оилаларига зарур ёрдам кўрсатилишини маълум қилган.