Глобал зиддиятлар кескинлашиб, халқаро муносабатларда ўзаро ишонч танқислиги сезилаётган бир даврда, Ўзбекистон ўзининг тинчликсевар ва қатъий ташқи сиёсий йўналишини яна бир бор жаҳон жамоатчилигига эълон қилди.

Нью-Йорк шаҳрида бўлиб ўтаётган БМТ Бош Ассамблеясининг нуфузли минбаридан сўз олган Президент администрацияси раҳбари Саида Мирзиёева бугунги мураккаб дунёда Ўзбекистон танлаган йўл ўзгармас эканини қатъий таъкидлади:

«Танлаган йўлимиз аниқ — очиқлик, яхши қўшничилик ва мулоқот. Биз тинчлик, ҳамкорлик ҳамда инсон қадр-қимматини эъзозлаш тарафдоримиз».

Тарихий нутқ давомида фақатгина ташқи сиёсат эмас, балки мамлакат ичида кечаётган туб ўзгаришлар ва замонавий глобал чақириқлар ҳам бош мавзу сифатида илгари сурилди. Хусусан:

Минтақада шаклланган яхши қўшничилик руҳ ва ўзаро манфаатли ҳамкорлик бугун бутун дунё эътироф этаётган реал воқеликка айлангани қайд этилди.

Ўзбекистонда қонун устуворлигини таъминлаш, инсон ҳуқуқ ва эркинликларини кафолатлаш йўлида қатъий қадамлар ташланаётгани урғуланди.

Глобал иқлим ўзгаришлари ва Орол денгизи қуриши билан боғлиқ муаммоларни бартараф этишда халқаро ҳамжамият биргаликда ҳаракат қилиши зарурлиги эслатилди.

Сунъий интеллект тараққиёти, уни ахлоқий меъёрлар ва инсон манфаатлари йўлида қўллаш масалаларига алоҳида эътибор қаратилди.