Исроил бош вазири Бенямин Нетаняхунинг БМТ Бош Ассамблеясидаги чиқиши кўплаб давлат вакиллари томонидан салбий қабул қилинди. Ynet нашри нутқ бошланишидан аввал зални оммавий тарк этган ёки умуман қатнашмаган давлатларни санаб чиқди.

Нашрнинг Исроил расмийларига таяниб хабар беришича, 77 та делегация зални нутқ бошланишидан олдин тарк этган ёки умуман қатнашмаган. Ушбу делегациялар ичида Ўзбекистон ҳам бор.

Миср, Иордания, Ливан ва Сурия, Саудия Арабистони, Туркия ва Эрон каби Исроилга минтақадош давлатлар ҳам Нетаняху нутқини бойкот қилган. Аммо Баҳрайн ва БАА вакиллари, Ғазодаги воқеалар сабаб муносабатлар таранглашган бўлса-да, ўз ўринларини тарк этмаган ва Нетаняхуни тинглашган. Исроил расмийлари буни ҳар икки давлат Тел-Авив билан расман дипломатик муносабатларга эгалиги билан изоҳлаган.

Нетаняху минбарга чиққан вақти бўшаб қолган зал суратлари халқаро даражада муҳокамаларга сабаб бўлди. Эрон олий раҳбари Али Хоманаий ушбу ҳолатга тўхталиб, Исроилни “энг нафратланилган ва энг яккаланган режим” деб атади.

“Кеча ўша қотил Нетаняху БМТ минбарида туриб, бўш ўринларга қараб нутқ сўзлади. Зулм остидагиларнинг дод-фарёди эрта ё кеч сизни қувиб етади”, – деган Ражаб Тоййиб Эрдўған.

Нетаняху сўзга чиққан вақти зални тарк этган ёки умуман қатнашмаган 77 давлат орасида Испания, Бразилия, ЖАР, Ирландия, Малайзия, Индонезия, Жанубий Корея, Қувайт, Қатар, Уммон, шунингдек Лотин Америкаси, Африка ҳамда Тинч океани минтақасидаги бир қатор мамлакатлар ҳам бор.

• БМТ
• Binyamin Netanyaxu
• Isroil