Филиппинда бортида 350 дан ортиқ одам бўлган паром чўкиб кетди. Камида 316 нафар йўловчи қутқарилиб, 15 киши эса ҳалок бўлган. Бу ҳақда “Синьхуа” агентлиги хабар берди.

Маълум қилинишича, МВ Триша Керстин 3 ороллараро юк ва йўловчи пароми бортида 332 йўловчи ҳамда 27 экипаж аъзоси бўлган. У Замбоанга порт шаҳридан Сулу провинциясидаги Жоло оролига йўл олган. Ярим тундан кейин, эҳтимол, техник носозлик юзага келиб, паром Басилан провинцияси қирғоқлари яқинида чўкиб кетган.

​Ҳодиса жойига қирғоқ қўриқлаш хизмати ва денгиз флоти кемалари, кузатув самолёти, Black Hawk ҳаво кучлари вертолёти ва қайиқлар жалб қилинган. Ҳозирда Басилан яқинида қидирув-қутқарув ишларини олиб борилмоқда.

Паром нега чўкиб кетгани ҳозирча номаълум, ҳолат юзасидан тергов ўтказилади. Текширувдан ўтган паромда ортиқча юк ёки одам ташиш ҳолатлари аниқланмаган.

Филиппинда денгиздаги бахтсиз ҳодисаларнинг тез-тез учрашига кучли бўронлар, кемаларнинг техник ҳолати, ортиқча йўловчи ташиш ва хавфсизлик қоидаларининг етарлича назорат қилинмаслиги сабаб бўлади.

• Филиппин
• Halokat
• dengiz