Доналд Трамп Truth Social ижтимоий тармоғида ёзишича, Хитой Канада бизнесини, ижтимоий тузилмасини ва турмуш тарзини вайрон қилади.

“Хитой Канадани тириклайин ейди, уни тўлиқ ютиб юборади”, — деб ёзади Қўшма Штатлар раҳбари.

Аввалроқ Reuters агентлиги Канада ва Хитой айрим маҳсулотлар бўйича божларни камайтириш юзасидан дастлабки келишувларга эришганини хабар қилганди. Хусусан, Оттава 2024 йилда жорий этилган 100 фоизлик бож ўрнига тахминан 6,1 фоизлик имтиёзли ставка асосида 49 мингтагача Хитой электромобилларини импорт қилишга рози бўлган. Пекин эса ўз навбатида Канаданинг бир қатор қишлоқ хўжалиги маҳсулотларига қўйилган божларни сезиларли даражада пасайтиришга розилик берган.

Reuters маълумотларига кўра, бу қадамлар Канаданинг Хитой билан савдо муносабатларини тиклаш ва ташқи савдони диверсификация қилишга қаратилган саъй-ҳаракатларининг бир қисми бўлиб, бу жараён глобал кескинлик ортиб бораётган ва АҚШ билан савдо ихтилофлари кучайган бир пайтда амалга оширилмоқда.

20 январь куни Давосда бўлиб ўтган Жаҳон иқтисодий форумида сўзга чиққан Канада бош вазири Марк Карни жаҳон иқтисодий ва сиёсий тизими ўзгариб бораётгани, ҳамда етакчи давлатлар белгиланган қоидаларга риоя қилишдан бош тортгани сабабли “жаҳон тартиби парчаланиши” ҳақида гапирди. Унинг сўзларига кўра, дунё геосиёсат халқаро меъёрлар билан чекланмай қўйган “шафқатсиз реаллик” босқичига кирди.

Шу билан бирга, Карни ўрта даражадаги давлатлар, жумладан Канада, ожиз эмаслигини ва янги жаҳон тартибини шакллантиришда иштирок этиш имкониятига эга эканини таъкидлаган эди.

• АҚШ
• Канада
• Трамп
• Хитой
• savdo