Марғилон шаҳрида барпо этилган “Бурҳониддин Марғиноний илмий-маърифий ва туризм мажмуаси” Фарғона водийсидаги энг йирик замонавий лойиҳалардан бири ҳисобланади. Мажмуа “шаҳар ичида шаҳар” тамойили асосида қурилган бўлиб, у ерда илм, маданият ва туризм йўналишлари бирлаштирилган.Мажмуа ичида энг диққатга сазовор жойлардан бири — “Отабек ва Кумуш уйи” музейи.

Бу ерда Абдулла Қодирийнинг машҳур “Ўткан кунлар” романидаги саҳналар асосида махсус тарихий ҳовли қурилиб, ўша давр муҳити жонлантирилган. Ташриф буюрувчилар бу ерга кирганда XIX аср охири ва XX аср бошларига хос миллий уй муҳитини кўради, романдаги воқеалар руҳини ҳис қилади ва ўзини гўё асар ичига киргандек ҳис этади. Мажмуа таркибида меҳмонхона, карвонсарой, ҳунармандчилик маркази, музейлар, миллий бозор, мақом театри ва кутубхона каби бир қатор объектлар ҳам мавжуд.

Бу эса уни нафақат сайёҳлик маскани, балки маънавий-маърифий марказга ҳам айлантиради.“Бурҳониддин Марғиноний” мажмуаси — тарих ва замонавийлик уйғунлашган маскан бўлиб, унинг ичидаги “Ўткан кунлар” саҳнаси жонлантирилгани ташриф буюрувчилар учун ўзига хос жонли музейга айлантирган.