Ўзбекистонлик қурувчи ва темирйўл мутахассислари Сербияда темирйўл инфратузилмасини модернизация қилиш ҳамда янги темирйўл участкаларини қуриш лойиҳаларида иштирок этади. Бу ҳақда “Замон” дастурида маълум қилинди.

7-сентабр куни Ўзбекистон Президенти ташрифи арафасида Ўзбекистон–Сербия ҳукуматлараро комиссиясининг илк йиғилиши ўтказилди. Унда Ўзбекистон инвестициялар, саноат ва савдо вазири Лазиз Қудратов ҳамда Сербиянинг халқаро иқтисодий алоқалар вазири Ненад Попович ҳамраислик қилди.

Йиғилишда транспорт, қишлоқ хўжалиги, енгил саноат, ахборот технологиялари ва сунъий интеллект, туризм, маданият, академик алмашинув ҳамда меҳнат миграцияси каби йўналишларда ҳамкорлик масалалари муҳокама қилинди.

Томонлар, шунингдек, эркин савдо тўғрисидаги битим бўйича музокараларни бошлашга келишиб олди. Мазкур келишув Ўзбекистон ва Сербия ўртасидаги савдо тартибларини соддалаштириш ҳамда товар ва хизматлар айирбошлаш ҳажмини оширишга қаратилган.

Лазиз Қудратовнинг маълум қилишича, Ўзбекистон ва Сербия темирйўл соҳасида ҳам қатор лойиҳаларни амалга ошириш бўйича келишувга эришган.

Хусусан, “Ўзбекистон темир йўллари” ва Сербия томони ҳамкорлигида мамлакатдаги темирйўл тармоғини модернизация қилиш, жумладан, 200 километрлик темирйўл участкасини қуриш режалаштирилмоқда.

Вазирнинг таъкидлашича, мазкур лойиҳалар бўйича тегишли протокол икки давлат президентларининг учрашувларидан сўнг имзоланиши кутилмоқда. Ҳозирда транспорт вазирликлари икки лойиҳа ва йўналиш бўйича музокаралар олиб бормоқда.

Қудратов ушбу ҳамкорлик Ўзбекистон қурувчиларининг Европа бозорига чиқиши ва қитъадаги йирик инфратузилма лойиҳаларида иштирок этиши учун муҳим имконият эканини таъкидлади.

Йиғилиш якунида саноат шериклигини ривожлантириш бўйича 2028 йилгача мўлжалланган қўшма ҳаракатлар режаси ҳам имзоланди.