Бугунги кунда Ўзбекистон иқтисодиёти тезкор глобал ўзгаришлар ва рақобат босими остида барқарор ўсишни таъминлаш вазифаси олдида турибди. Шу боис мамлакатимизда саноат, IT ва молия соҳаларида технологик трансформацияни жадал ривожлантириш, меҳнат унумдорлиги ва энергия самарадорлигини ошириш, инвестиция ва инновацияларни фаол жалб қилишга қаратилган кенг кўламли дастурлар ва ислоҳотлар амалга оширилмоқда. Ушбу комплекс чора-тадбирлар орқали 2026 йилда иқтисодиётда юқори ўсишни таъминлаш, капитал бозори ва рақамли стартаплар сектори ривожланиши, яширин иқтисодиёт улушини қисқартириш ва мамлакатни глобал инвестициялар учун жозибадор ҳудудга айлантириш мақсад қилинмоқда.

Давлат Раҳбарининг навбатдаги Мурожаатномасида келгуси йили иқтисодиётда 6,6 фоиз ўсишни таъминлаб, ялпи ички маҳсулотни 167 миллиард долларга етказилиши мақсад қилинганлигини маълум қилди.

Агар меҳнат унумдорлиги, энергия самарадорлиги ва таннарх бўйича қаттиқ ишланса, бу кўрсаткични янада ошириш учун барча имкониятлар бор. Шу боис, саноатда “Унумдорлик ва самарадорликни икки карра ошириш” дастури бошланиши кўзда тутилмоқда.

Иқтисодиёт ва молия вазирлиги томонидан меҳнат унумдорлиги ва энергия самарадорлиги бўйича алоҳида лойиҳа амалга оширилади.

Ушбу лойиҳага халқаро молия институтларидан 200 миллион доллар кредит ва грант жалб қилиниб, саноат корхоналари учун хориждан юқори малакали технолог ва муҳандислар олиб келинади, бизнес жараёнлари рақамлаштирилади, энергия ва бошқа харажатларни қисқартириш бўйича аудитлар ўтказилади ҳамда илғор технологиялар трансфер қилинади. Бу борада “Тўртинчи саноат инқилоби маркази” ташкил қилинади.

Марказ негизида робототехника, интернет буюмлари, “ақлли фабрика” каби “Индустрия 4.0” ечимларини саноат корхоналарида жорий этиш учун “тартибга солиш механизми” яратилади.

Бунда, корхоналар янги технологияларни ишлаб чиқаришга жорий қилишдан олдин уларни синовдан ўтказиш имконига эга бўлади.

Аккредитация, метрология ва стандартлаштириш соҳаларидаги ислоҳотларимиз натижасида Ўзбекистон “Глобал сифат инфраструктураси” индексида сўнгги икки йилда 15 поғона юқорилаб, 52-ўринга кўтарилди (185 та давлат ичида).

Улар шундай маҳсулотни ўтган йилга нисбатан оширса, кўпайган маҳсулот ҳажми қийматининг 5 фоизи миқдорида субсидия берилади. Корхона мутахассисларининг илмий-тадқиқот ва конструкторлик ишланмаларидан олган даромади солиқдан озод қилинади.

Ана шундай ислоҳотлар орқали келгуси беш йилда саноатда меҳнат унумдорлиги 30 минг долларга етказилади ва 1 минг долларлик қўшилган қиймат яратишга кетадиган энергия сарфи 1,5 баробар камайтирилади.

Шавкат Мирзиёевнинг Мурожаатнома давомида маълум қилишича, бу йил IT, fintex, сунъий интеллект каби йўналишлардаги маҳаллий стартапларга хориждан 270 миллион доллар инвестиция жалб қилинди.

Шунингдек, кейинги йилдан “Рақамли стартаплар” дастурини кенгайтириб, “стартап ғоясидан то экспортгача” кўмаклашадиган янги тизимни йўлга қўйилиши айтилди. Бунда, хусусий стартап марказларини ташкил этиш учун Ёшлар жамғармасидан беш йил муддатга 5 миллиард сўмгача фоизсиз ссуда берилиши таъминланади.

Олийгоҳларнинг ўзида қоладиган маблағларнинг 10 фоизи ҳам инкубация марказларини ривожлантиришга йўналтирилади. 

Бундан ташқари, Марказий банкда Fintex офиси ва Инновацион хаб ташкил этилиб, унга Сингапурдан мутахассислар жалб қилинади. Бу орқали йилига 15-20 та финтех стартапни ташқи бозорга олиб чиқиш, уларга жами 1 миллиард доллар инвестиция жалб қилиш имконияти яратилади.

Умуман, венчур фондлар, стартаплар, финтех каби янги молиявий инструментлар бозорини ривожлантириш, бу соҳадаги барча иштирокчилар ҳуқуқларини қонун билан кафолатлаб қўйиш зарурлиги маълум қилинди.

Шу сабабли давлат Раҳбари Парламент Ҳукумат билан биргаликда “Муқобил инвестиция жамғармалари тўғрисида”ги қонунни 1 мартгача ишлаб чиқишини билдирди.

Мурожаатнома давомида давлат Раҳбари иқтисодиётда ўсишни таъминлаш ва саноатни модернизация қилиш мақсадида меҳнат унумдорлиги ва энергия самарадорлигини оширишга қаратилган лойиҳаларни йўлга қўйишини маълум қилди. IT, финтех ва сунъий интеллект соҳаларида стартаплар ва инкубация марказлари қўллаб-қувватланади, венчур фондлар ва молиявий инструментлар ривожлантирилади. Бундан мақсад – ишлаб чиқариш қувватларини кенгайтириш, рақамли ва инновацион технологияларни тарғиб қилиш ҳамда халқаро инвестицияларни жалб қилиш орқали саноат ва иқтисодиётни янги босқичга олиб чиқишдир.

• Мурожаат
• Олий Мажлис
• Шавкат Мирзиёев