Ўзбекистон Республикаси Президентининг Саудия Арабистонига давлат ташрифи якунланди.

Давлат раҳбари 17 август куни Валиаҳд шаҳзода Муҳаммад бин Салмон Ол Сауд билан музокара ўтказди. Унинг натижалари бўйича Ўзбекистон Республикаси билан Саудия Арабистони Подшоҳлиги ўртасида кенг қамровли шериклик муносабатларини янада кенгайтириш тўғрисида Қўшма баёнот, шунингдек, энергетика, божхона, фуқаро авиацияси, туризм, қишлоқ хўжалиги, соғлиқни сақлаш, меҳнат муносабатлари соҳаларида 15 та ҳужжат қабул қилинди.

18 август куни Ислом ҳамкорлик ташкилоти ҳамда Ислом тараққиёт банки раҳбарлари, саудиялик ишбилармонлар билан учрашувлар ўтказилди.

Макка ва Мадина шаҳарлари зиёрати ҳам ташрифнинг алоҳида эътиборли воқеаси бўлди.

Президент Шавкат Мирзиёев Саудия Арабистонига ташрифи чоғида муқаддас Макка шаҳрида ҳам бўлиб, умра амалларини бажарди.

Давлат раҳбари динимиз арконларига мувофиқ эҳромга кириб, намоз ўқиди, талбия айтиб, Масжидул Ҳарамга борди.

Маълумки, Каъбатуллоҳнинг ичига кириш мусулмонлар орзу қиладиган улуғ шарафдир. Президентимиз ана шундай шарафга муяссар бўлиб, Каъбатуллоҳнинг ичида намоз ўқиди.

Сўнг, Байтуллоҳ атрофида етти бор тавоф, Сафо ва Марва тепаликлари орасида еттита саъй қилинди.

Мамлакатимиз делегацияси аъзолари, уламо ва зиёлилар билан биргаликда юртимизга тинчлик ва тараққиёт, халқимизга саломатлик ва фаровонлик тилаб дуолар ўқилди.

Президент Шавкат Мирзиёев 19 августга ўтар кечаси Жиддадан Тошкентга жўнаб кетди.

• Makka
• Ўзбекистон
• Саудия Арабистони