Farg‘ona va Namangan viloyatlarida o‘tkazilgan tezkor tadbirlar davomida jami 2 kg 643 gramm “gashish” moddasi ashyoviy dalil sifatida olindi. Bu haqda Davlat xavfsizlik xizmati ma’lum qildi.

DXX Farg‘ona viloyati bo‘yicha boshqarmasi xodimlari viloyat Ichki ishlar va Bojxona boshqarmalari bilan hamkorlikda “Farg‘ona – Toshkent” yo‘nalishida harakatlangan “Kobalt” avtomashinasini Pop tumanidagi “Namangan” YPX maskanida to‘xtatgan. Tekshiruvda Chirchiq shahrida yashovchi, 1995-yilda tug‘ilgan fuqaro boshqaruvidagi avtomobil yukxonasidan 1 kg “g ashish” aniqlangan.

Namangan viloyatida DXX boshqarmasi, Ichki ishlar va Bojxona organlari hamkorligida Chust tumanida o‘tkazilgan tadbirda “VAZ-2103” avtomashinasi tekshirilgan. Unda Yangi Namangan tumanida yashovchi, 1987-yilda tug‘ilgan, muqaddam sudlangan shaxsga tegishli avtom obil salonidan 995 gramm “gashish” topilgan.

Shuningdek, Namangan shahrida yashovchi, 1975-yilda tug‘ilgan fuqaroning xonadoni ko‘zdan kechirilganda, yerto‘lasidan 648 gramm “gashish” olingan. Aniqlanishicha, u ushbu moddani Yangi Namangan tumanida yashovchi, 1972-yilda tug‘ilgan tanishidan 5 ming AQSH dollariga sotib olgan. Maz kur shaxs ham protsessual tartibda ushlangan.

Hozirda barcha qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.