Ўзбекистонда электр энергияси ва табиий газдан интизомли фойдаланиб келаётган корхоналар учун «намунали истеъмолчи» мақоми жорий этилди. Эндиликда ушбу мақомга эга тадбиркорлар электр энергияси ва табиий газ учун 100 фоиз эмас, ҳисобот ойи қийматининг 15 фоизини олдиндан тўлайди.

Президентнинг ПФ-202-сон фармонига кўра, тегишли ҳисоблаш тизимларига — электр энергияси бўйича ЭҲНАТ (АСКУЭ), табиий газ бўйича ТГНҲАТ (АСКУГ)га уланган, масофадан бошқариш имкониятига эга ҳисобга олиш ускуналари мавжуд, муддати ўтган қарздорлиги ва қоидабузарликлари бўлмаган тадбиркорлик субъектларига ушбу тартиб татбиқ этилади.

Қолган тўловларни ой давомида истеъмолчининг эҳтиёжидан келиб чиқиб, қисмларга бўлиб амалга ошириш мумкин. Бу тадбиркорларнинг айланма маблағларини бир вақтнинг ўзида катта миқдорда тўловга йўналтириб қўймасдан, уларни ишлаб чиқариш ва бошқа зарур харажатларга сарфлаш имконини беради.

Мазкур тартиб Президент Шавкат Мирзиёевнинг 2026 йил 18 август куни тадбиркорлар билан очиқ мулоқотида билдирилган таклифлар асосида жорий этилди. Энергетика вазирлиги маълумотига кўра, янги тартиб тўлов интизомига риоя қилаётган тадбиркорлар учун қўшимча қулайлик яратади. Шунингдек, фармон билан қарздорлик сабаб электр энергияси ёки табиий газ тармоғидан узилган истеъмолчиларни қайта улаш учун олинадиган қўшимча тўлов ҳам бекор қилинди.