Бугун Ўзбекистон раҳбарининг ёшлар билан ўтказилган учрашувида волонтёрликка алоҳида эътибор қаратилди.

Сўнгги йилларда волонтёрлик фаолиятининг ҳуқуқий асоси яратилгани, Волонтёрлар мактаби, олийгоҳларда марказлар ташкил қилингани ҳисобига бундай ёшлар 5 карра кўпайди.

Вазирлик ва идоралар раҳбарлари, фаол кўнгилли ёшлардан иборат Волонтёрлик ҳаракатини ривожлантириш бўйича Васийлик кенгаши ташкил қилинади.

Ёшлар агентлигида “Волонтёрликни қўллаб-қувватлаш” жамғармаси ташкил қилинади.

Ушбу жамғармага ҳар йили бюджетдан 20 миллиард сўмдан маблағ берилади. Бунга қўшимча вилоят ҳокимлари ҳам маҳаллий бюджетдан 3 миллиард сўмдан ажратади.

Бу маблағлар ҳисобидан ёшларнинг волонтёрлик лойиҳаларига 100 миллион сўмгача грант берилади.

Кўнгилли ёшларга “ижтимоий фаоллик картаси” очиб, экология, ижтимоий ҳимоя, тиббиёт, таълим, жамоат хавфсизлиги каби йўналишлардаги иштирокига қараб балл берилиши йўлга қўйилади.

Мазкур ташаббуслар волонтёрлик ҳаракатини янги босқичга олиб чиқишга қаратилган комплекс ёндашув эканини кўрсатади. Давлат томонидан ҳуқуқий асослар мустаҳкамланиб, махсус тузилмалар ва қўллаб-қувватлаш механизмлари жорий этилиши кўнгилли ёшларнинг фаоллигини янада оширишга хизмат қилади.

• Президент
• Ёшлар
• muloqot
• волонтёрлик