7 июль куни Олий Мажлис Қонунчилик палатасида лотин ёзувига асосланган ўзбек алифбосини такомиллаштириш тўғрисидаги қонун лойиҳаси қабул қилиниб, Сенатга юборилди. Қонун лойиҳасига кўра, янги алифбо 26 та ҳарф ва 3 та ҳарфлар бирикмаси ўрнига 28 та ҳарф ҳамда 1 та тутуқ белгисидан иборат бўлади.

Шунингдек, айрим ҳарфларнинг қўлланилишига аниқлик киритилади. Муҳокамалар давомида депутатлар янги алифбони босқичма-босқич жорий этиш бўйича қатор таклифларни илгари сурди. Унга кўра, қонун кучга киргунга қадар расмийлаштирилган ҳужжатлар, миллий валута ва қимматли қоғозлар ўз кучини сақлаб қолади. Шунингдек, давлат органлари ва ташкилотларининг рамзлари, пешлавҳалари, кўрсаткичлари ҳамда бошқа атрибутларидан белгиланган муддатгача фойдаланишга рухсат берилади.