Ўзбекистон ягона энергетика тизимида 14 июль куни ёзги мавсум учун электр энергияси истеъмоли 284 миллион кВт/соатга етиб, янги тарихий рекорд қайд этилди. Бу ҳақда Энергетика вазирлиги маълум қилди. Қайд этилишича, мазкур кўрсаткич 13 июлдаги ёзги рекорд (278,6 миллион кВт/соат) ҳамда 24 январда қайд этилган қишки максимум (283 миллион кВт/соат)дан ҳам юқори бўлган.

Рекорд қайд этилган кунда мамлакатда 287,3 миллион кВт/соат электр энергияси ишлаб чиқарилган. Вазирлик юқори истеъмол даврида айрим ҳудудларда техник носозликлар сабаб электр таъминотида вақтинчалик узилишлар кузатилиши мумкинлигини билдириб, аҳолини электр энергиясидан оқилона фойдаланишга чақирди. Шунингдек, кондиционерларни 24–26°C ҳароратда ишлатиш ва фильтрларини мунтазам тозалаб туриш тавсия этилди. Бу электр энергияси сарфини камайтириш, тармоқларга тушадиган юкламани пасайтириш ҳамда саломатлик учун қулай шароит яратишга хизмат қилади.