Президент Шавкат Мирзиёев ёқилғи-энергетика соҳасидаги инвесторлар билан очиқ мулоқот ўтказмоқда. Учрашувда энергетика тизимини ривожлантириш, соҳага инвестициялар жалб этиш ва энергия таъминоти барқарорлигини ошириш масалалари муҳокама қилинмоқда. Тадбир доирасида умумий қиймати 4,7 миллиард долларлик олтита йирик лойиҳа бўйича битимлар имзоланди.

Давлат раҳбари энергетикани тараққиётнинг юраги деб атаб, барқарор энергия таъминоти тадбиркорлар сармояси ва аҳолининг эртанги кунга ишончи учун муҳим эканини таъкидлади.

Қайд этилишича, сўнгги ўн йил давомида энергетика соҳасидаги муаммоларни ҳал қилиш, эскирган қувватларни янгилаш ва ортиб бораётган талабни қоплаш мақсадида энергетика бозори хусусий инвестициялар учун очилди ҳамда давлат-хусусий шериклик механизмлари жорий этилди. Ушбу даврда соҳага 35 миллиард доллар инвестиция киритилди. Ҳамкор давлатлар сони эса 2–3 тадан 10 дан ортиққа етди.

Қуёш, шамол ва гидроэлектр станциялари ҳисобига қайта тикланувчи энергиянинг жами электр энергияси ишлаб чиқаришдаги улуши 31 фоизга кўтарилди. «Яшил» энергия ишлаб чиқариш қувватлари 11,1 гигаваттни ташкил этмоқда. Аҳоли жон бошига электр энергияси ишлаб чиқариш ҳажми 28 фоизга ошиб, йилига 2 300 киловатт-соатга етди.

Имзоланган олтита йирик лойиҳа доирасида 3 минг мегаватт электр энергияси ишлаб чиқариш ва 400 мегаватт энергия сақлаш қувватларини яратиш режалаштирилган.

Ҳозирда умумий қиймати 4,7 миллиард долларлик лойиҳалар бўйича битимлар имзоланган бўлиб, уларнинг амалга оширилиши натижасида янги генерация ва энергия сақлаш қувватлари яратилиши кўзда тутилган.