Украина Президенти Владимир Зеленский истеъфога чиқишни режалаштирмаётганини маълум қилди. Шунингдек, у мамлакатдаги хавфсизлик вазияти сабабли ҳозирги шароитда президентлик сайловларини ўтказиш имконсизлигини айтди. Бу ҳақда Зеленский журналист Пирс Морганнинг “Uncensored” шоусида сўзлаган.

Журналистнинг истеъфога чиқиш режалари ҳақидаги саволига Украина раҳбари: “Албатта, йўқ. Бу менинг масъулиятим”, деб жавоб берган.

Зеленский сайловларни ўтказишга асосий тўсиқ сифатида мамлакатдаги хавфсизлик вазиятини кўрсатган. Унинг таъкидлашича, Украинага ҳар соатда ҳужумлар уюштирилаётган бир пайтда сайлов ўтказиш хавфсизлик нуқтаи назаридан мумкин эмас. Шунингдек, президент фронтдаги ҳарбий хизматчилар ҳам овоз бериш ҳуқуқига эга бўлиши ва биринчи навбатда ўз танловини амалга ошириши кераклигини таъкидлаган.

Аввалроқ АҚШ Президенти Дональд Трамп Зеленскийни танқид қилиб, Украина келишувлар тузишга қодир янги етакчи топиши кераклигини айтган эди. Зеленский эса Россия 60 кунлик тўлиқ ўт очишни тўхтатишга рози бўлса, президентлик сайловларини ўтказишга тайёрлигини билдирган. Бироқ Кремль ушбу таклифни рад этган.

Ҳозирча Зеленский истеъфога чиқиш нияти йўқлигини билдирган, сайловлар ўтказиш масаласи эса хавфсизлик вазияти ва ўт очишни тўхтатиш бўйича келишувларга боғлиқ бўлиб қолмоқда.