16 сентябрь куни Тошкент вилояти Паркент тумани, “Хўжа” маҳалласи, Ҳунарманд кўчаси 47 уйда яшовчи Насиба Бегматова уйидан ўра қаздираётганда мис тангалар топган ва бу ҳақда мутахассисларга хабар берган.

Ҳолатни ўрганиш учун Ўзбекистон Республикаси Фанлар Академияси Миллий археология катта илмий ходими Дилмурод Нормуродов ва бир қанча археология мутахассислари жалб қилинган. Маълум бўлишича, тангалар сони 939 та бўлиб, уларнинг XVI аср охири ва XVII аср бошларига оид эканлиги аниқланган.

Мис тангалар топилган жойнинг ўзида кўздан кечирилиб, уларнинг диаметри 115 сантиметр бўлган ўранинг ер сатҳидан 40-50 сантиметр чуқурлигида, бир жойда тўпланган ҳолда топилганлиги, тангалар топилган жойдаги тупроқ орасидан ўлчами 25х25х5 сантиметр бўлган пишиқ ғишт бўлаги, мовий рангда сирланган ва сирсиз идишларнинг майда парчалари сақланганлиги аниқланган.

Тангаларни ўрганиш давомида улар йиллар мобайнида нам тупроққа қоришиб чириганлиги ва бунинг оқибатида икки томонининг бироз текислангани, тангаларда араб алифбосидаги ёзувлар мавжудлиги маълум бўлган.

Тангалар билан бирга 25х25х5 сантиметр ҳажмдаги пишган ғиштлар, мовий рангдаги сирланган ва сирсиз сопол идиш синиқлари ҳам ашёвий далил сифатида қайд этилган.

• Arxeologiya
• Хазина