Айни кунларда телефон орқали пенсия ёшидаги фуқароларга нотаниш рақамлар орқали қўнғироқ қилиниб, уларнинг пенсиялари кейинги ойдан оширилишини айтиб, пластик карта ёки паспорт маълумотларини сўраш ҳолатлари учрамоқда. Бу ҳақда Пенсия жамғармаси огоҳлантирмоқда.

Жамғарма хабарига кўра, фирибгарлар ўзларини банк ёки Пенсия жамғармаси ходими сифатида таништирмоқда. Яъни, улар одамларга “Нафақангиз кейинги ойдан оширилади. Бунинг учун маълумотларингизни ва телефонингизга келган кодни айтсангиз, пенсиянгиз картангизга тушади. Бўлмаса ошмай қолади”, – деган маънода ёлғон гапириб, пенсионерларнинг ишончига киришга уриниш ҳолатлари кўпайган.

Маълум қилинишича, Пенсия жамғармаси ходимлари ҳеч қачон қўнғироқ қилиб, шахсий маълумотларни ёки телефонга келган кодларни сўрамайди. 

Огоҳлантиришда, бегона шахсларга паспорт, пластик карта ёки ЖШШИР (ПИНФЛ) рақами каби шахсий маълумотларни ҳеч қачон тақдим қилмаслик сўралган.

Шунингдек, шубҳали ҳолатларда 1271 – Пенсия жамғармасининг ишонч телефони ёки 102 – Ички ишлар органлари рақамларига телефон қилиш зарурлиги эслатиб ўтилган.

• Жамғарма
• Ogohlantirish
• пенция