Ўзбекистонда ташқи реклама ва ёзувларни жойлаштириш тартиби қайта кўриб чиқилмоқда. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.

Қайд этилишича, Вазирлар Маҳкамасининг “Ташқи ёзувларни тартибга солиш тўғрисида”ги қарори лойиҳаси ишлаб чиқилган. Ҳужжатда ташқи ахборот воситаларини жойлаштириш, улардан фойдаланиш ва назорат қилиш тартиби аниқ белгилаб берилмоқда.

Янги лойиҳага кўра, амалиётда турли талқинларга сабаб бўлаётган тушунчалар — “ташқи ахборот воситаси”, “ташқи ёзув”, “ахборот кўрсаткич”, “пешлавҳа”, “эълон” ва “маълумотлар тахтаси”га аниқлик киритилади.

Муҳим жиҳатлардан бири — пешлавҳа реклама сифатида баҳоланмайди. Яъни савдо, умумий овқатланиш ва хизмат кўрсатиш объектларида ташкилот номи ёки фаолият турини билдирувчи ёзувлар учун энди рухсатнома олиш ва тўловларни амалга ошириш талаб этилмаслиги мумкин.

Шунингдек, ташқи ахборот воситаларида тижорат ёки реклама мазмунидаги материалларни жойлаштиришга чекловлар белгиланиши кўзда тутилган.

Мазкур ўзгаришлар тадбиркорлар учун ортиқча бюрократик юкни камайтириш ва фаолиятни соддалаштиришга қаратилган.