Покистонда K2 Airways авиакомпаниясига тегишли Boeing 737-400 юк самолёти Арабистон денгизи устида радарлардан ғойиб бўлди. Ҳозирда ҳарбийлар ва қутқарув хизматлари самолётни қидирмоқда. Бу ҳақда The Express Tribune хабар берди. Маълум қилинишича, самолёт Шаржадан Карачи шаҳрига парвоз қилаётган бўлган. У Карачи портидан тахминан 250 километр ғарбда радарлар экранидан йўқолган. Бортда экипажнинг беш нафар аъзоси бўлган.

Покистон аэропортлар бошқармаси (ПАА) маълумотига кўра, радарлар самолётнинг кескин баландлик йўқотгани ва йўналишини ўзгартирганини қайд этган. Бундан бир неча дақиқа аввал эса учувчи навигация тизимида носозлик юзага келгани ҳақида хабар берган. Flightradar24 кузатув хизмати ADS-Б тизимидан олинган дастлабки маълумотлар эҳтимолий авиаҳалокат юз берган бўлиши мумкинлигини кўрсатган. Самолёт қулаши тахмин қилинаётган ҳудудга Покистон Ҳарбий-денгиз кучларининг ПНС Зулфиқар кемаси ҳамда Сааб 2000 Эриэе узоқ масофали радар самолёти юборилган.

Қидирув-қутқарув ишларига Покистон миллий кемачилик корпорациясининг Лаҳор кемаси ҳам жалб этилган. Маълумотларга кўра, ушбу Boeing 737-400 дастлаб йўловчи самолёти сифатида хизмат қилган. У 1999 йилда Аэрофлот, 2004 йилда Garuda Индонесиа авиакомпанияси таркибида парвоз қилган. 2012 йилда эса юк ташишга мослаштирилиб, TNT Airways ва кейинчалик ASL Airlines томонидан фойдаланилган. Эслатиб ўтамиз, Покистондаги сўнгги йирик авиация ҳалокати 2020 йилда содир бўлган. Ўшанда Pakistan International Airlines самолёти Карачи аэропортига қўниш чоғида ҳалокатга учраб, бортдаги 99 кишидан 97 нафари ҳалок бўлган эди.