“Ўзбекистон элчихонаси ва Миграция агентлиги ҳамкорлигида оғир моддий қийинчиликка тушиб қолган бир гуруҳ ҳамюртларимиз ватанга қайтарилди”, – деб хабар қилмоқда “Дунё” агентлиги.

Аниқланишича, фуқароларнинг мушкул вазиятларга тушиб қолишига турли ҳолатлар сабаб бўлган. Кимдир ҳужжатларини йўқотгани боис ишга жойлаша олмаган бўлса, бошқа биров меҳнат фаолияти давомида оғир хасталикка чалинган.

Жумладан, ҳужжатларини йўқотиб, ишсиз ва оғир молиявий аҳволга тушиб қолган хоразмлик Й.А. полиция органлари томонидан ушланганидан сўнг, унга зудлик билан консуллик-ҳуқуқий ёрдам кўрсатилган. Унга Миграция агентлиги билан ҳамкорликда авиачипта ва вақтинчалик қайтиш сертификати расмийлаштирилиб, ватанга қайтарилади.

Ҳужжатлари ўғирланиб мушкул вазиятга тушиб қолган қашқадарёлик фуқарога ҳам ўз вақтида ёрдам кўрсатилиб, Ўзбекистонга қайтиши таъминланган.

Лодз воеводалиги Велюн шаҳрида юрак хуружи оқибатида вафот этган наманганлик фуқаронинг жасади Миграция агентлиги билан ҳамкорликда Ўзбекистонга қайтарилган.

Полшадаги логистика компаниясида ишлаган ва хизмат сафари давомида Эстониянинг Тарту шаҳрида инсультга учраган тошкентлик З.М.га ҳам ҳар томонлама амалий ёрдам кўрсатилиб, у Ўзбекистоннинг Полша ва Латвиядаги элчихоналари, Миграция агентлиги ҳамда “Узбекистан Airways” авиакомпанияси кўмагида махсус тиббий жиҳозлар ва шифокорлар кузатувида “Рига–Тошкент” йўналиши бўйича ватанга олиб келиниб, шифохонага жойлаштирилган.

Шунингдек, иш жойида бахтсиз ҳодиса натижасида оёғи синган андижонлик Т.И.га биринчи тиббий ёрдам кўрсатилиб, Миграция агентлиги билан ҳамкорликда Ўзбекистонга қайтарилиши таъминланади.

Бундан ташқари, иш жойида йиқилиб, мия чайқалиши оқибатида касалхонага жойлаштирилган наманганлик Н.А.нинг ҳолати доимий назоратга олиниб, унга зарур тиббий муолажаларни олишда амалий ёрдам кўрсатилган.

• Моддий ёрдам
• Ўзбекистонлик
• Полша
• migrant