Шаҳрисабз туманидан оқиб ўтувчи тез оқар каналда фожиавий якун топиши мумкин бўлган ҳодиса юз берди. Бир фуқаро ўз эҳтиётсизлиги оқибатида сувга тушиб кетган ва кучли оқим уни қарийб 100 метр масофага оқизиб кетган.

Сув гирдобида қолган фуқаро қирғоқ бўйидаги шох-шаббаларга илиниб қолган ва айнан шу ҳолат унинг ҳаётини сақлаб қолиш учун сўнгги имкониятга айланган.

Яқин атрофдаги “Зибинисо” болалар оромгоҳида хизмат ўтаётган оддий аскар Ш. Бобоев эса сувда илашиб қолган одамни пайқаб қолади ва сонияларни бой бермай, зудлик билан туман Фавқулодда вазиятлар бўлимининг қутқарув қисмига хабар беради. Воқеа жойига етиб келган ФВБ қутқарувчилари махсус анжомлар ёрдамида тезкор ҳаракат қилиб, фуқарони каналнинг қарама-қарши қирғоғидан хавфсиз ҳудудга олиб ўтган.