АҚШнинг Огаё штатида жойлашган Ҳамден қишлоғидаги хароба уйдан тўрт йил давомида битта хонада яшашга мажбур қилинган 16 нафар бола қутқарилди. Бу ҳақда маҳаллий ҳуқуқ-тартибот идоралари маълум қилди. Маълум бўлишича, 1,5 ёшдан 18 ёшгача бўлган болаларнинг барчаси бир оилага мансуб. Текширув давомида уйда санитария ҳолати мутлақо талабга жавоб бермагани, хоналар инсон чиқиндиларига тўлгани аниқланган. Айрим болалар гапира олмаган, ривожланишида нуқсони бўлган 18 ёшли қиз эса ҳатто ўз исмини ёзишни ҳам билмаган. Воқеа юзасидан болаларнинг ота-онаси ҳамда икки нафар буви ва бобосига нисбатан болаларни хавф остида қолдириш моддаси бўйича 16 та айблов эълон қилинди.

Прокуратура мазкур жиноят одам савдоси билан боғлиқ эмас, балки бир оила ичида содир этилган зўравонлик ҳолати эканини маълум қилди. Ҳуқуқ-тартибот идоралари болаларни бошқа жиноят юзасидан ўтказилган тинтув давомида аниқлаган. Расмийларга кўра, улар тахминан 3,5×3,5 метр ўлчамдаги битта хонада сақланган. Уйда қафаслар топилмаган, бироқ болаларнинг ташқарига чиқишига қандай тўсқинлик қилингани ҳозирча аниқланмаган. Қутқарилган болалардан етти нафари шифохонага ётқизилган, яна икки нафари вертолёт орқали оғир жароҳатлар марказига олиб кетилган. Улардан бири оғир аҳволда бўлгани сабаб сунъий нафас олдириш аппаратига уланган.

Тергов маълумотларига кўра, оила сўнгги 20 йил давомида Огаё штатининг турли ҳудудларида яшаб, болаларни давлат органлари назоратидан яширишга уринган. Улар мактабга ҳам юборилмаган. Ҳозирда барча 16 нафар бола давлат ҳимоясига олинган. Тергов ҳаракатлари давом этмоқда.