Шавкат Мирзиёев 2026 йилда Ню Ёрк ёки Вашингтон шаҳрида ўзбекистонликлар учун маҳалла гузари ташкил этиш бўйича топшириқ берди. Бу ҳақда давлат раҳбарининг Ташқи ишлар вазирлиги ҳамда хориждаги дипломатик ваколатхоналар фаолиятига бағишланган йиғилишида сўз борди.

Қайд этилишича, президент АҚШдаги ватандошлар билан учрашувлар чоғида маҳалла гузари ташкил этиш ташаббусини илгари сурган. Мазкур гузар Нью-Йорк ёки Вашингтонда барпо этилиши режалаштирилмоқда. Топшириқни амалга ошириш вазифаси Ўзбекистоннинг АҚШдаги элчиси Фурқат Сиддиқовга юклатилди.

“Шу бўйича тадбиркорлардан таклиф олиб, ўзимиздан ҳам шерик қилиб, яхши лойиҳа қилинглар. Ватандошларимизга бир макон қуриб берайлик, бу уларга ғурур ва ифтихор бағишласин”, – деди Шавкат Мирзиёев.

​​Маълум қилинишича, ушбу маҳалла гузарида Ўзбекистон байроғи ўрнатилади. Шунингдек, миллий ошхоналар ва чойхоналар ташкил этилиши ҳам кўзда тутилган. Давлат раҳбари ушбу лойиҳа бўйича аниқ ва амалий таклифлар ишлаб чиқишни топширди.

Элчи Фурқат Сиддиқов ўз нутқида 2018 йил Ўзбекистон—АҚШ муносабатларида муҳим бурилиш бўлганини қайд этди. Унинг айтишича, Шавкат Мирзиёев ва Доналд Трамп ўртасидаги мулоқот икки томонлама алоқаларни тизимли босқичга олиб чиққан.

“Энди АҚШ раҳбарияти, Оқ уй вакиллари ва конгрессменлар билан тўғридан-тўғри мулоқот қилиш имконияти мавжуд. Бу борада барча эшиклар очилди. 2026 йилда экспортни диверсификация қилишни режалаштиряпмиз”, – деди элчи.

​​Шунингдек, жорий йилда Ўзбекистонда ишлаб чиқариладиган 14 турдаги янги маҳсулотни АҚШ бозорига чиқариш режалаштирилгани маълум қилинди. Бундан ташқари, 100 та тўқимачилик компаниясига WRAP сертификатини олиб бериш ҳам мақсад қилинган.

• АҚШ
• Маҳалла
• Президент
• Шавкат Мирзиёев