”Asian Boxing” ташкилотининг навбатдаги конгресси бўлиб ўтди.

Бугун Таиланднинг Бангкок шаҳрида “Asian Boxing” ташкилотининг навбатдаги конгресс йиғилиши ташкил этилди. Унда Осиё қитъаси боксининг келажакдаги режалари кўриб чиқилиб, ушбу ташкилот раҳбариятига номзодлар сайланди.

Унга кўра, “Asian Boxing” ташкилотининг президенти этиб, амалдаги раҳбар таиландлик Пичай Чунхаважира қайта сайланди. Ундан ташқари ташкилотга вице-президент номзоди овозга қўйилди. Ушбу лавозимга Қозоғистон, Япония, Филиппин вакиллари ва Ўзбекистон бокс федерацияси раисининг биринчи ўринбосари Сакен Пўлатов номзодлар қўйилган эди. У якунда ушбу лавозимга сайланди. Аёллар йўналишида вице-президент лавозими фаластинлик Фотима Аҳмадга насиб этди.

“Ўйлаймизки, Сакен Пўлатов ўзининг юксак тажрибаси, билими билан нафақат ўзбек боксини ривожида, балки, Осиё боксини юксалтиришда ҳам ўз ҳиссасини қўшиб, уни жаҳонда юқори поғоналарга олиб чиқишига ишонамиз.

Фурсатдан фойдаланиб, Ўзбекистон бокс федерацияси ва боксчилар оиласи номидан Сакен Пўлатовни янги лавозим билан қутлаб, унинг келажакдаги ишларига омад ва зафарлар тилаймиз” – дейилади бокс федерациясининг хабарида.

• Амалдорлар
• Бокс
• Президент
• Халқаро