Кеча, 1 октябрь куни тунда Самарқанд давлат архитектура-қурилиш университетида ёнғин содир бўлган эди. Мазкур ҳолат бўйича Самарқанд вилояти ФВБ матбуот хизмати маълумот берди.   

Қайд этилишича, жорий йилнинг 1 октябрь куни соат 23:45 да Самарқанд шаҳар Лолазор кўчасида жойлашган Самарқанд Давлат Архитектура-қурилиш институти ҳудудида янгидан қурилаётган (қурилиши тугалланмаган) фаоллар залида ёнғин содир бўлганлиги тўғрисида вилоят ФВБ га хабар берилган.

Шунга кўра, 6 та ёнғин-қутқарув экипажлари жалб қилиниб, воқеа жойига соат 23:54 да етиб бориб, соат 00:30 да ёнғин тўлиқ бартараф этилган.

Ёнғин натижасида эски қурилиш маҳсулотлари ёниб зарарланган.

Ҳодиса оқибатида жабрланган ва ҳалок бўлганлар йўқ.

Ҳозирда терговга қадар текшириш ишлари олиб борилиб, ёнғиннинг келиб чиқиш сабаби аниқланаётгани маълум қилинди.

• Институт
• Самарқанд
• ёнғин