Республика шошилинч тиббий ёрдам илмий маркази Самарқанд вилояти филиалига 29 ёшли фуқаро қорин соҳасидаги кучли оғриқ билан мурожаат қилган. Марказ ахборот хизматининг хабарига кўра, унинг ошқозонидан 200 граммга яқин мих ва “саморез” топилган.

Шошилинч қабул бўлимида ўтказилган диагностика ва лаборатория текширувлари давомида беморнинг ошқозон-ичак тизимида кўп миқдорда металл жисмлар, жумладан, мих ва “саморез” борлиги аниқланган.

Шифокорлар беморга зудлик билан жарроҳлик амалиёти ўтказиш зарурлигини белгилаган. Марказнинг олий тоифали шифокори Йўлдош Қулиевнинг маълум қилишича, барча тайёргарлик жараёнларидан сўнг лапаротомия ва гастростомия усулида операция амалга оширилган.

Амалиёт давомида беморнинг қорин бўшлиғидан қарийб 200 граммга яқин металл жисмлар олиб ташланган. Жарроҳлик бир соатга яқин вақт давом этган. Ҳозирда беморнинг аҳволи қониқарли, у мустақил ҳаракатлана олмоқда.

Маълум қилинишича, эркак кучли стресс ҳолатига тушиб, ўз хатти-ҳаракатларини назорат қила олмаган ва ушбу металл буюмларни ютиб юборган.

• Самарқанд
• fuqaro
• shifoxona
• stress