Украина Президенти Владимир Зеленский Россия Украинага янги оммавий ҳужум тайёрлаётгани ҳақида разведка маълумотлари мавжудлигини билдирди. Бу ҳақда у ўзининг Telegram-каналида маълум қилди.

Зеленскийнинг айтишича, Украина ҳаво мудофаасини кучайтириш ва янги воситалар билан таъминлаш масаласида иттифоқчилари билан доимий мулоқот олиб бормоқда.

«Ҳозир Россия Украинага янги оммавий ҳужум тайёрлаётгани ҳақида разведка маълумотлари бор», — деб ёзди Украина президенти.

У Украина аҳолиси ҳар куни ракета ва дронлар ҳужуми хавфи остида яшаётганини таъкидлаб, Россияга нисбатан санкцияларни юмшатиш масаласини муҳокама қилиш мумкин эмаслигини билдирди.

Россия қўшинлари сўнгги вақтларда Украина ҳудудига дрон ва ракеталар орқали кенг кўламли зарбалар бермоқда. Киев маълумотларига кўра, ҳужумлар нафақат тунги вақтда, балки кундузи ҳам амалга оширилмоқда.

Шунингдек, Россия сўнгги ойларда реактив двигателли дронлардан ҳам фойдалана бошлаган. Украина томонининг таъкидлашича, бундай қурилмалар ҳаво мудофааси учун қўшимча хавф туғдирмоқда.

Зеленский Нью-Йоркда АҚШ Президенти Дональд Трамп билан ҳам учрашиб, Россия–Украина урушига барҳам бериш масаласини муҳокама қилган. Томонлар, жумладан, энергетика инфратузилмасига зарбаларни тўхтатиш эҳтимолини ҳам муҳокама қилган.

Reuters маълумотларига кўра, Россия қўшинлари Донецк вилоятида секин илгарилаётган бўлса-да, фронт чизиғида бир неча ойдан бери катта ўзгаришлар кузатилмаган. Украина эса Россия ҳудудидаги, жумладан, нефть саноати объектларига зарбалар бермоқда.

Зеленский, шунингдек, The Wall Street Journal нашрига берган интервьюсида Россия президенти Владимир Путин урушда ғалаба қозонаётгани ҳам, мағлуб бўлаётгани ҳам йўқ, деган фикрни билдирган.

Украина президентининг таъкидлашича, Путин ҳозирча урушни тўхтатиш зарур, деган хулосага келмаган.

Эслатиб ўтамиз, аввалроқ Украина ҳарбий раҳбарияти Россия ҳужумларига жавобан узоқ масофага ҳаракат қилувчи қуроллардан фойдаланиш бўйича янги операцияларни келишиб олганини маълум қилган эди.