Сирдарё вилоятидаги 398 та хусусий боғчада ўтказилган санитария текширувларида қатор қоидабузарликлар аниқланди. Бу ҳақда ЎзА хабар берди.

Текширувларда болаларга яратилган шарт-шароитлар санитария талабларига жавоб бермаслиги маълум бўлди. Хусусан, 60 та боғчанинг ошхонаси таъмирталаб ҳолда экани, сув таъминотида узилишлар борлиги, қўл ювиш ускуналари етарли даражада жиҳозланмагани аниқланган.

Шунингдек, айрим муассасаларда ходимлар ва болалар белгиланган муддатларда тиббий кўрикдан ўтмагани, ётоқ чойшаблари эскиргани, айрим хоналар ва эшиклар таъмирталаб экани қайд этилган.

Камчиликлар асосида бир қатор боғчалар фаолияти вақтинча тўхтатилган. Масъуллар камчиликларни бартараф этиб, болалар учун соғлом ва хавфсиз муҳит яратиши мақсадида шундай чора кўрилган.

“Текширув натижаларига кўра, санитария талаб ва меъёрларини бузган 329 нафар масъул шахсга нисбатан суд органлари томонидан умумий 333 миллион 480 минг сўм миқдорида маъмурий жарималар қўлланилди”, – дейди Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитасининг Сирдарё вилояти бошқармаси бошлиғи Жўрабек Ҳасанов.​

Ҳозирда аниқланган камчиликларни бартараф этиш бўйича махсус ишчи гуруҳлар ташкил этилган.

• Болалар боғчаси
• Qoidabuzarlik
• SSV
• Sanitariya
• Сирдарё
• tekshiruv