Собиқ Спорт вазирлигининг мансабдор шахсларига жиноий иш қўзғатилди

Антикоррупция агентлиги ўрганишлар бўйича тўпланган ҳужжатларни қонуний баҳо бериш учун Бош прокуратурага юборган.

Коррупцияга қарши курашиш агентлиги собиқ Жисмоний тарбия ва спорт вазирлиги мансабдор шахсларининг хатти-ҳаракатларидан норози бўлиб йўлланган мурожаат бўйича маълумот берди.

Қайд этилишича, фуқаро М.Д. йўллаган мурожаат бўйича ўрганиш ўтказилган ва қуйидагилар маълум қилинган.

Қайд этилишича, мурожаатда келтирилган важларни холис ўрганиш мақсадида ваколатли идоралар ходимларидан иборат ишчи гуруҳ тузилган. Ишчи гуруҳ томонидан собиқ Жисмоний тарбия ва спорт вазирлигининг айрим мансабдор шахслари томонидан бир қатор хато ва камчиликларга йўл қўйилгани аниқланган.

Жумладан, 2019 йилда Италиянинг Педилуко шаҳрида академик эшкак эшиш бўйича ўтказилган турнир ҳамда ўқув йиғини машғулотида Ўзбекистон миллий терма жамоасининг иштирокини таъминлаш учун давлат бюджетидан 334 миллион сўм, 20 680 евро ва 1500 доллар ажратилган. Бироқ ўрганишлар давомида ушбу халқаро тадбирлар учун сарфланган маблағларни тасдиқловчи ҳужжатлар мавжуд эмаслиги маълум бўлган.

Шунингдек, 2019 йилда Токио ва Пекин шаҳарларида синхрон сузиш бўйича бўлиб ўтган халқаро мусобақаларда ушбу тадбирларга масъуллар 1015 доллар миқдорида ортиқча харажатга йўл қўйган.

Бундан ташқари, вазирлик томонидан 2020 йилда бюджет маблағлари ҳисобидан спорт жиҳозлари сотиб олиш учун “Машхим” МЧЖ, “Араббой спорт” ХК ва “Спорт жиҳоз льюкс” ХКлари билан 45 та ҳолатда 15 миллиард сўмлик шартномалар тузилган. Ўрганишда 6 та шартнома бўйича сотиб олинган 2,9 миллиард сўмлик жиҳозларнинг фойдаланиш учун тарқатилганини тасдиқловчи ҳужжатлар мавжуд эмаслиги аниқланган.

Ўрганиш якуни бўйича тўпланган ҳужжатлар қонуний баҳо бериш учун Бош прокуратурага юборилган.

• Аксилкоррупция
• Жиноят
• Спорт