Сочларнинг ҳажмдор эмаслиги кўплаб аёллар дуч келадиган муаммолардан бири. Қизлар ва аёллар ушбу муаммони ҳал қилишга уриниб, махсус косметик воситалар, сочларни шишириш ва бошқа машҳур усуллардан фойдаланишади. Сиз ҳам барча усулларни синаб кўриб, ҳеч қандай натижага эриша олмаган бўлсангиз, қуйидаги лайфхаклар ёрдам бериши мумкин.

1-лайфхак. Аввал кондиционер

Биринчи навбатда муаммони сочларни ювиш жараёнидан қидирамиз. Шубҳа йўқки, сиз ҳам кўпчилик қизлар каби сочларингизни аввал шампунь билан ювиб, кейин толаларга кондиционер суртишга одатлангансиз. Биз сизга ана шу кетма-кетликни ўзгартиришни маслаҳат берамиз. Биринчидан, кондиционер сочларни ювишга тайёрлаб беради ва шампундан кейинги қуруқликдан ҳимоя қилади. Иккинчидан, бундай техника сочларни турмаклаётганда уларга жуда яхши ҳажм беради. Шампундан олдин ишлатилган кондиционер толаларнинг учини намлантиради, лекин уларни оғирлаштириб қўймайди.

2-лайфхак. Қуруқ шампундан фойдаланинг

Қоидага кўра, қуруқ шампунни сочларингизни ювишга вақт топа олмаганингизда қўллаш тавсия этилади. Қуруқ шампунь соч толаларининг кирини ўзига тортиб олади ва уларни тоза кўринишга келтиради. Бундай восита тезлик билан сочларни тартибга келтириб олишга ва уларни ҳажмдор кўрсатишга ёрдам беради. Шампунь тугмасини бир неча марта босишингиз билан сочларингиз аввалгидан анча яхши кўринади. Бундан ташқари, ихчамроқ идишдаги шампунь сотиб олсангиз, уни ёнингизда олиб юрсангиз ҳам бўлади.

Қуруқ шампунь сочлар илдизига ҳажм беради, сочларингиз ҳажмдор бўлиб туриши учун шампунни фақат кир сочларга эмас, тоза сочлар илдизига ҳам сепса бўлади. Бироқ, бу усулдан кўп фойдаланиш ярамайди. Шампунь табиий маҳсулотлардан тайёрлангани билан бош терисидаги тешикчаларнинг ёпилиб қолишига олиб келади. Тешиклар чанг ва кирга тўлиб қолади. Бош териси шампунь қатлами билан ёпилиб қолган бўлса, соч толалари каби нафас ололмайди. Бу бош терисининг қичишиши ва яллиғланишга олиб келади, шунинг учун воситадан фойдаланишда меъёрни унутмаган маъқул.

3-лайфхак. Фарқни бошқа томондан очинг

Сочларнинг фарқини ҳар доим битта томондан очиш одати кўпчиликда бор. Сочлар ҳам бора-бора фарқ очилган ҳолатга ўрганиб қолади. Бундай бефарқлик эса ёқимсиз оқибатларга олиб келиши мумкин. Биринчидан, бу сочлар учун зарарли – фарқ очилган жойдаги соч толалари оз-оздан тўкилиб, очиқ жой пайдо бўлади. Иккинчидан, фарқнинг ўрни тез-тез ўзгартириб турилмаса, соч турмаклари ҳажмдор бўлиб чиқмайди. Сочларингизни ювиб чиққандан кейин, бошингизни фен билан қуритаётганингизда фарқни бошқа томондан очинг. Шунда уларни ўзингиз хоҳлаган томонга қаратиб тарайдиган бўласиз.

Эътибор беринг: сочларингизнинг фарқини бугун битта томондан очсангиз, эртага унинг ўрнини беркитинг ва фарқни иккинчи томондан очинг. Бундай ҳийла сочлар заифлашишининг олдини олади, шунингдек сочларни ҳажмдор ва тоза қилиб кўрсатади.

4-лайфхак. Сочларни қуритишда қўлларни ҳам ишга солинг

Сочлар соғлом ва ҳажмдор кўриниши учун уларни фен билан қуритаётганда тароқдан фойдаланиш керак эмас. Бундай ҳолатда уларни юлиб олишингиз мумкин. Ҳўл сочлар одатда тароқ билан таралса, толага ҳам, илдизига ҳам зарар етади. Сочларни қуритишда уларни бармоқлар билан бироз юқорига кўтариб, кейин фенни ишга солиш керак. Сочлар керакли кўринишга кирганидан кейин жараённи тароқ ёрдамида якунлаш мумкин. Соч турмаги тайёр бўлганидан кейин бошингизни пастга эгинг ва феннинг иссиқ ҳаво оқимини сочлар орасига йўналтиринг. Бу ҳам сочларга қўшимча ҳажм беради!

5-лайфхак. Сочларни бошқача усулда турмакланг.

Ёйилган сочлар ҳажмдор ва чиройли кўринишига қарамай, уларни резинка билан йиғсангиз, соч толалари ҳажмидан асар ҳам қолмайди. Сочлар сийрак эканлигини дарҳол "сотиб қўяди". Хайриятки, ушбу муаммонинг ажойиб ечими бор. Бунинг учун сочларни йиғинг, уларнинг устки қисмидан бир тутам толани ажратиб олиб, остига тўғнағич тақиб қўйинг. Шундан кейин соч толасини тўғнағич устидан тушириш мумкин. Шунинг ўзиёқ сочларга қўшимча ҳажм беради.

6-лайфхак. Сочларни шишириш ҳам мумкин

Ҳа, биз бу усул ҳақида аввалдан яхши билганмиз. Ҳозир эса сочларни шишириш урфдан чиқиб кетган. Шунга қарамасдан сочларни тароқ ёрдамида енгил шишириб олиш зарар қилмайди. Ундан ҳам яхшироқ яна бир усул бор. Бу соч толаларини тароқ билан эмас, тиш чўткаси ёрдамида шишириш. Сочларни бир нечта тутамларга ажратиб олинг ва тиш чўткаси билан толаларнинг илдиз қисмини шиширинг. Бундай ҳийла сочларингизнинг ҳажмдор кўринишига ёрдам беради.

7-лайфхак. Косметик воситаларнинг кераклисини танланг

Дўконларнинг расталарида турган сочларни парвариш қилиш воситаларини кўриб, қайси бирини танлашни билмай қоласиз. Дўконга косметик восита харид қилишга борганингизда айрим қоидаларни унутиб қўйманг: сочларингиз сийрак бўлса, гель ва ёғ сотиб олиш ҳақида ўйламасангиз ҳам бўлади. Улар соч толаларини оғирлаштириб қўяди ва керакли ҳажмни бера олмайди. Баъзида эса бор ҳажмни ҳам йўқ қилади. Махсус кўпик, мусс, енгил спрейлар гель ва ёғдан фарқли ўлароқ, муаммони ҳал қилиши мумкин. Мисол учун, кафтингизга озроқ мусс сиқиб чиқарасиз ва уни нам сочларга илдизларидан бошлаб учлари томонга қараб суртасиз. Шундан кейин сочларни фен ёрдамида қуритиб оласиз.

8-лайфхак. Сочлар учун тартибсиз турмакларни танланг

Сочларни қанчалик қаттиқ тортиб турмак қилсангиз, улар шунчалик хунук ва ҳажмсиз кўринади. Шунинг учун тартибсиздек кўринадиган соч турмакларига кўпроқ эътибор беринг. Ёйилган ёки йиғиб олинган турмакдан соч толалари ташқарига чиқиб турса, турмак ҳам ҳажмдор бўлиб кўринади. Лекин, махсус воситаларни қўлламаган ҳолатда бундай натижага эришиб бўлмайди. Сочингизни турмаклашда сизга қуруқ шампунь ёрдам беради.

Сочларингизни жингалак қилиб олишингиз ҳам мумкин. Йирик ёки майда кўринишдаги жингалак толалар текисланган сочларга нисбатан ҳажмдор кўринади.

• Фойдали
• қизиқарли