Сурхондарё вилояти Денов шаҳридаги савдо мажмуасида 7 декабрь куни тонгга яқин чақнаш юзага келди. Бу ҳақда аввалроқ хабар берилганди. Фавқулодда вазиятлар вазирлиги ахборот хизмати воқеа юзасидан қўшимча маълумотлар берди.

Хабарга кўра, Денов шаҳри Мустақиллик кўчасида жойлашган 2 қаватли “Инденим” савдо мажмуаси биносида газ-ҳаво аралашмаси билан боғлиқ чақнаш юзага келган. Чақнаш натижасида содир бўлган ёнғин 28 дақиқа мобайнида ФВВ куч-воситалари томонидан ўчирилган.

ФВВ олиб борган қидирув ишлари натижасида вайрона бўлган бино остидан бир нафар ҳалок бўлган фуқаро аниқланган. Тан жароҳати олган 9 нафар фуқаро эса шаҳар шифохонасига ётқизилган. 

Эслатиб ўтамиз, воқеа юзасидан бош вазирнинг биринчи ўринбосари А.Раматов бошчилигидаги Ҳукумат комиссияси сафарбар этилган. Ҳозирда дастлабки терговолди суриштирув ишлари олиб борилмоқда.

• ФВВ
• Ўзбекистон
• Термиз
• фожеа
• ёнғин