“Кечадан буён шу ҳақда юзлаб саволлар келмоқда. Тушунтиришга ҳаракат қиламан.

Ягона давлат имтиҳони ғояси ҳақиқатдан бор, дастлаб бу ҳақда 2020 йилда ҳужжат лойиҳаси ишлаб чиқилган эди. Айтмоқчиманки, бу кеча чиққан янгилик эмас, бир неча йилдан буён ўйлашмоқда.

Мазкур тизимни тахминан 2028 йилдан кейин жорий этилиши режалаштирилган(агар улгуришса). Яъни келаси йилдан бўлар экан, деб ваҳима қилиш шартмас.

Ягона давлат имтиҳони нима?

11-синф якунида топшириладиган давлат аттестацияси бошқа тизимлар билан бирлаштирилади;

Ўқувчилар мактабни битираётганда топширган имтиҳон натижаси университетларга кириш учун ҳам ўтади;

Мазкур синов ўз навбатида Миллий сертификат ўрнини ҳам босади.

Бундан нима мақсад кўзланган?

Абитуриентларни ортиқча оворагарчиликдан қутқариш(мактаб имтиҳони, сертификат ва алоҳида кириш тестлари ўрнига битта имтиҳон);

Фақат ёдлашга эмас, балки фикрлаш, эссе (иншо) ёзиш, матнни тушуниш, мантиқий фикрлаш каби кўникмаларга ҳам эътибор қаратиш. Чунки ҳозир кириш имтиҳонидаги ёпиқ тест шаклидаги(4 та вариантли) тестлар асосан хотирага йўналтирилган холос, фикрлашга эмас.

Тартиби қандай бўлади?

Имтиҳонлар Билимларни баҳолаш агентлигининг ҳудудлардаги махсус катта павилёнларида, компьютер орқали топширилади;

Ҳар бир мактаб битирувчилари график асосида навбатма-навбат имтиҳон топшириб чиқади. Шу битта имтиҳон натижаси университетларга кириш учун ҳам ўтади;

Бу ҳали тахминий тартибларга таклифлар холос, аниқ қарор ёки расмий ҳужжат йўқ. Тартиби тасдиқлангандан кейин, аниқроқ ва батафсилроқ нимадир айтиш мумкин.

Хулоса: бу ўзгаришлар яқин йилларда бўлади дегани эмас. Тизимдан мақсад — оворагарчиликка барҳам бериб, ёшларни шаблондан чиқариб, уларда мустақил фикрлаш кўникмасини ривожлантириш” - деб ёзади Хушнуд Худойбердиев.

• Олий таълим
• Sirtqi ta'lim
• Таълим
• masofaviy ta'lim