Эрон мамлакатдаги кучли қурғоқчилик туфайли Теҳрон аҳолисига сув етказиб беришни чеклай бошлади.

Бу ҳақда маҳаллий ОАВлар хабар бермоқда.

“Бу сув исрофгарчилигининг олдини олишга ёрдам беради, гарчи у бироз ноқулайлик туғдирса ҳам”, – деган Эрон энергетика вазири Аббос Алиободий.

Эрон матбуотига кўра, шанбага ўтар кечаси Теҳроннинг турар-жойларида сувнинг вақти-вақти билан узилиши аллақачон бошланган.

Эроннинг Haft-e Sobh газетасининг қайд этишича, тармоқ босимининг пасайиши, ер усти ва ер ости сувлари захираларининг камайиши Теҳрон сув таъминотида “жиддий беқарорлик”га сабаб бўлган.

Аввалроқ Эрон президенти Масъуд Пезешкиён сув инқирози туфайли Теҳроннинг эвакуация қилинишини истисно қилмаслигини айтган эди. “Эрон табиий муаммоларга дуч келмоқда - ёғингарчиликнинг этишмаслиги ва сув ресурсларининг камайиши оғир оқибатларга олиб келади”, – деган Пезешкиён.

Давлат раҳбари “яқин келажакда ёмғир ёғмаса, келаси ойдан бошлаб Теҳронда сув таъминотига қаттиқ чекловлар жорий этишга мажбур бўламиз. Ёмғир бўлмаса, захираларимиз тугайди ва биз шаҳарни эвакуация қилишга мажбур бўламиз”, — дея қўшимча қилган у.

Эронда сўнгги беш йил ичида ёғингарчилик доимий равишда камайган. Маҳаллий метеорология хизматлари маълумотларига кўра, бу йил Теҳронга мавсумий ўртачадан 40 фоизга кам ёмғир ёққан. Баҳор ва ёзда ёмғирнинг деярли йўқлиги сув омборларидаги сув сатҳининг кескин пасайиб кетишига олиб келган.

• Eron
• Ичимлик суви
• Tehron
• cheklov