Ёшлар ишлари агентлиги китоб сотиш билан шуғулланадиган ва тармоқларда “Тирик китоб” номи билан машҳур бўлган Хайрулла Асадовга букинист дўкончаси қуриб берадиган бўлди. Бу ҳақда агентлик матбуот хизмати хабар берди.

Бир неча кун аввал у кўчма савдо шохобчасида текширувдан сўнг маъмурий жаримага тортилгани хабар қилинган эди. Текширув давомида у тадбиркорлик фаолияти билан тегишли рўйхатдан ўтмасдан китоб сотиш билан шуғуллангани, 20 минг сўмлик китоб хариди учун чек бермагани ва ушбу суммани касса аппаратига кирим қилмагани аниқланган ва БҲМнинг 5 баравари (2 млн 60 минг сўм) миқдорида жарима тайинланган.

Шунингдек, нархи 1 миллион 520 минг сўм бўлган 3 турдаги 100 дона китоби мусодара қилинган. Ёшлар ишлари агентлиги ҳозирги кунда кўчаларда китоб савдосини замонавий, тартибли ва қулай форматга ўтказиш бўйича амалга оширилаётган ишлар доирасида аниқ амалий чоралар кўрилиши режалаштирилганини билдирди. Китобдор Хайрулла Асадовни қўллаб-қувватлаш мақсадида унга замонавий букинист дўкончаси ўрнатиб берилиши, фаолиятини барқарор ва тизимли йўлга қўйиши учун ушбу янги савдо нуқтасига қўшимча 2000 дан ортиқ китоб тақдим этилиши маълум қилинди.

Ёшлар ишлари агентлиги президент қарорида китоб савдосига қулай шароит яратиш, Ўзбекистон бўйлаб китоб кўчалари ва боғларини ташкил этиш ҳамда уларни тизимли қўллаб-қувватлаш устувор вазифа этиб белгилангани алоҳида таъкидланган.

• Китоб
• Ёшлар ишлари агентлиги
• savdo