Аввалроқ, Тошкент вилоятидаги хонадонларнинг бирида итларнинг сўйилганлиги акс этган видео тарқалган эди.

Мазкур ҳолат Юқори Чирчиқ тумани ИИБ томонидан аниқланиб, воқеа юзасидан қўшимча суриштирув ишлари олиб борилди.

Шундан сўнг, буни содир этган фуқаро 10 суткага қамалди.

Суриштирувлар натижасида Юқори Чирчиқ тумани “Аҳмад Яссавий” маҳалласида яшовчи, 1986 йилда туғилган фуқаро, Б.Х. ўзининг яшаш хонадонида 25 та итни санитария қоидаларига зид равишда сақлаганлиги ва уларни сўйиб келаётгани аниқланганди.

“Меҳр ва оқибат” ҳайвонларни ҳимоя қилиш жамиятининг маълум қилишича, 11-март куни ушбу ҳолат юзасидан суд мажлиси бўлиб ўтди ва айбдор шахсга 10 сутка қамоқ жазоси тайинланди.

Судда айбланувчи Б.Х. итларни ўзи истеъмол қилиши учун сўйганини айтган. Нега уйига ҳар куни итлар олиб келингани ҳақидаги саволга эса жавоб бера олмаган.

Тошкент вилояти ИИББ матбуот хизмати туман ИИБ ва Ветеринария бўлими ҳамкорлигида тегишли ҳужжатлар расмийлаштирилиб, сўйилган итларнинг сони ва ушбу фуқаронинг итларни сўйишдан кўзлаган мақсадига ойдинлик киритиш жараёни кетаётганини маълум қилганди.

Волонтёрлар 35 та ит ва 9 та кучукни сақлаб қолишга муваффақ бўлган. 10 та ит “Кавчег” бошпанасига, қолганлари эса “Меҳр” марказига ўтказилган.

• ИИБ
• Toshkent viloyati
• Yuqori Chirchiq