Ўзбекистонда педагоглар учун пойтахт ёки вилоят марказига бориб, бир ойлик мажбурий малака ошириш курсида ўқиш талаби бекор қилинади. Унинг ўрнига касбий ривожланиш ваучерлари жорий этилади.

Президент Шавкат Мирзиёев ўқитувчилар малакасига тўхталар экан, болаларнинг қизиқиши, дунёқараши ва ахборот олиш хусусияти ўзгараётганини таъкидлади. «Кеча самара берган дарс усули бугун етарли бўлмаслиги мумкин. Шу сабаб муаллимнинг мунтазам ўқиши ва ўз устида ишлаши зарур», — деди давлат раҳбари.

Янги тартибга кўра, муаллим тоифа синовидаги натижасига қараб 18 соатдан 72 соатгача таълим олиш имкониятига эга бўлади. Педагог малака ошириш курси ва таълим оладиган жойни ўзи танлайди.

Давлат раҳбари ушбу ўзгариш малака ошириш жараёнини расмиятчиликдан амалий эҳтиёжга айлантириши кераклигини таъкидлади.