9 сентябр куни Адиблар хиёбонида “Халқ юраги” туркумидаги ҳужжатли филмлар ижодкорларини тантанали тақдирлаш маросими бўлиб ўтди.

2020 йил 20 май куни Ўзбекистон Республикаси Президенти Шавкат Мирзиёев томонидан Адиблар хиёбонининг очилиш маросимида Кинематография агентлигига мажмуада ҳайкаллари ўрнатилган атоқли ёзувчи ва шоирлар ҳақида ҳужжатли филмлар яратиш вазифаси юклатилган эди.

Бу йўналишда олиб борилган дастлабки ижод намунаси сифатида 2020 йилда ўзбек шоир ва ёзувчиларга бағишланган “Халқ юраги” ҳужжатли филми яратилди. Кинематография агентлиги томонидан ҳар бир ёдгорликка бириктирилган олий ўқув юртлари билан ҳамкорликда 24 та “Халқ юраги” номли туркум ҳужжатли филмлар яратилди. Мазкур картиналар орасидан ҳакамлар ҳайъати режиссёр Хусан Рашидовнинг “Чўлпон. Қуш эсдалиги” кинолентаси энг муносиб деб топди.

Бугун “Халқ юраги” лойиҳасида филмларни суратга олган режиссёрлар тантанали равишда қимматбаҳо совғалар билан тақдирланди. Таниқли киноижодкорлар, ёзувчилар, санъат ва маданият арбобларидан иборат нуфузли ҳакамлар ҳайъати томонидан аниқланган ғолиб бош соврин – Chevrolet Cobalt автомобили эгасига айланди.

“Чўлпон. Қуш эсдалиги” филми орқали мен мана шу мукофотга сазовор бўлдим. Албатта, муваффақиятга умид қилган эдик, чунки салкам 300 кишилик жамоа билан филм устида астойдил иш олиб бордик. Ёш киноижодкорларга, хусусан, ҳужжатли филм ижодкорларига берилаётган имкониятлар, бундай улкан рағбатлар учун муҳтарам Президентимиздан беҳад миннатдорман. Мен умумий ғалабамизда иштирок этган барчага - жамоамга, ота-онамга, устозларимга раҳмат айтмоқчи эдим. Ўзбек киноси тарихида бундай мотивасия ва рағбатлантириш биринчи марта деб ҳисоблайман”, — дейди танлов ғолиби, филм постановкачи режиссёри Хусан Рашидов.

Пойтахтдаги олий ўқув юртлари раҳбарларига “Халқ юраги” туркумидаги барча филмлар акс этган флеш-дисклар ва албомлар топширилган бўлса, режиссёрлар замонавий планшетлар билан тақдирланди.

“Янги Ўзбекистонда ҳужжатли филм йўналиши юксалиб бормоқда. Ўзбекистон Республикаси Президенти Шавкат Мирзиёев ва мамлакат ҳукумати томонидан мазкур соҳанинг қўллаб-қувватланаётганидан беҳад мамнунмиз. Ўзбекистон кинематографияси тарихида илк бор ҳужжатли филм ижодкорлари орасида йирик танлов ўтказилди. Биз пандемия даврида 24 та филм яратиш устида фидокорона меҳнат қилган ҳужжатли кино ижодкорларни муносиб рағбатлантиришга ҳаракат қилдик. Бош соврин – Chevrolet Cobalt автомобили ёш киноижодкорлар учун кучли мотивасия бўла олади”, — деди Ўзбекистон Республикаси Кинематография агентлиги Бош директори Фирдавс Абдуҳолиқов.

• Агентлик
• Кино
• Ўзбекистон
• Тошкент