АҚШ президенти Доналд Трамп 7 июль куни Анқарада бўлиб ўтаётган НАТО саммити доирасида Туркия президенти Ражаб Тоййиб Эрдўған билан учрашуви арафасида АҚШ 2020 йилда Туркияга нисбатан жорий этилган CAATSA санкцияларини бекор қилишини маълум қилди. Шунингдек, у Анқарага F-35 қирувчи самолётларини сотиш имконияти ҳам кўриб чиқилаётганини билдирди. Трамп НАТО саммитида иштирок этиш учун Анқарага етиб келди. Аэропортда уни шахсан Президент Ражаб Тоййиб Эрдўған кутиб олди. АҚШ президенти фахрий қоровулга турк тилида «Мерҳаба asker!» дея мурожаат қилди.

Кутиб олиш маросимида АҚШнинг Туркиядаги элчиси Том Баррак, НАТОдаги доимий вакил Метт Уитакер ҳамда Қуролли кучлар штаб бошлиқлари қўмитаси раиси генерал Ден Кейн ҳам иштирок этди. Мазкур ташриф АҚШ президентининг сўнгги 11 йил ичида Туркияга амалга оширган илк расмий ташрифи бўлди. F-35 масаласи ҳам кун тартибида «Биз санкцияларни бекор қиламиз», — деди Трамп.

Унинг таъкидлашича, бу борадаги ишларни АҚШ Давлат котиби ва Молия вазири олиб бормоқда. Шунингдек, Трамп Туркияни АҚШнинг содиқ иттифоқчиси деб атаб, Анқарага F-35 қирувчи самолётларини сотиш имконияти кўриб чиқилаётганини маълум қилди. Бироқ амалдаги қонунчилик ва юридик чекловлар сабаб бу жараён қандай амалга оширилиши ҳозирча очиқланмади. АҚШ қонунчилигига кўра, Туркия Россиянинг С-400 ҳаво мудофаа тизимларига эгалик қилаётган экан, унга F-35 самолётларини сотишга рухсат берилмайди. Вашингтон ушбу тизимни F-35 дастури хавфсизлигига таҳдид сифатида баҳолайди. Маълумотларга кўра, сўнгги ҳафталарда С-400 мажмуаларини учинчи давлатга топшириш варианти муҳокама қилинмоқда. Бироқ бу масала ҳали якуний келишув босқичига етмаган ва Россиянинг позицияси ҳам номаълумлигича қолмоқда.

Эслатиб ўтамиз, АҚШ 2020 йилда Туркиянинг Россиядан С-400 зенит-ракета мажмуаларини харид қилгани сабаб Анқарага нисбатан CAATSA санкцияларини жорий этган ва уни F-35 дастуридан чиқариб юборган эди.