Қатар пойтахти Доҳа шаҳрида АҚШ ва Эрон ўртасида ўтказилган навбатдаги билвосита музокаралар якунланди. Бироқ томонлар ҳозирча узоқ муддатли тинчлик келишувига эришилганини маълум қилмади.

Маълум қилинишича, музокараларда асосий эътибор Ҳормуз бўғозидаги денгиз қатновини тиклаш ҳамда Эроннинг музлатилган маблағлари масалаларига қаратилган. Шунингдек, июнь ойида эришилган вақтинчалик келишувнинг асосий бандлари ҳам муҳокама қилинган.

Қатар Ташқи ишлар вазирлиги навбатдаги музокаралар Эрон олий раҳбарининг дафн маросимидан сўнг ўтказилишини билдириб, Доҳадаги учрашувларда маълум даражада ижобий силжиш кузатилганини қайд этди.

АҚШ президенти Дональд Трамп эса Эроннинг ядровий дастури бўйича ҳам муайян тараққиёт борлигини айтди. Аммо музокаралардан хабардор манбаларга кўра, техник учрашувларда ядровий дастур масаласи муҳокама қилинмаган.

Қайд этилишича, АҚШ ва Эрон делегациялари тўғридан тўғри учрашмаган. Музокаралар Қатар ва Покистон воситачилигида алоҳида форматда ўтказилган.

Айни пайтда Ҳормуз бўғози орқали кемалар ҳаракати қисман тикланган. Бироқ стратегик сув йўлининг ҳуқуқий мақоми ҳамон баҳсли бўлиб қолмоқда. Шу билан бирга, Эрон август ўрталаридан бошлаб бўғоз орқали ўтувчи кемалардан тўлов ундириш ниятини яна бир бор маълум қилди.