Туғилганлик ҳақидаги гувоҳномани онлайн олиш имконияти яратилди. Бу ҳақда Рақамли ҳукумат портали хабар берди.

Эндиликда мазкур хизматдан Ягона портал орқали фойдаланиш мумкин. Бунинг учун ҳеч қандай ҳужжат талаб этилмайди.

Хизматдан фойдаланиш учун қидирув тизимига “Туғилганлик ҳақидаги гувоҳномани олиш” калит сўзларини киритиш керак, ундан кейин керакли саҳифа шаклланади.

Ариза жўнатиш учун порталда шахсий ҳисоб бўлиши керак. Шунингдек, порталда ариза ҳолатини кузатиб туриш имконияти мавжуд. Хизмат 1 иш кунида кўрсатилиб, гувоҳномани қулай вақтда почта орқали олиш мумкин.

Хизматдан фойдаланиш пуллик бўлиб, портал орқали фойдаланганда 10 фоизлик чегирма тақдим этилади — 44 550 сўм (0,135 БҲМ). Почта тўлови 25000 сўмни ташкил этади.

Туғилганлик ҳақидаги гувоҳнома учун аризани ушбу ҳавола орқали жўнатиш мумкин.

Хизматдан энди дунёга келган чақалоқлар учун биринчи маротаба гувоҳнома олишда фойдаланилади. Бошқа ҳолатлар учун Ягона порталда туғилганлик ҳақида такрорий гувоҳнома олишга ариза бериш хизмати мавжуд.