Туркиянинг Royal Seginus меҳмонхонасида Россиянинг «Шинник» жамоаси футболчилари Украинанинг «Минай» клуби ўйинчилари билан муштлашиб кетишди.

Россия манбаларининг маълум қилишича, украиналик спортчилар россиялик футболчилар билан бир меҳмонхонада ўқув-машғулот йиғинида яшашини билиб, ўзини тажовузкор тутиб, атайлаб жанжал қўзғатган.

Дастлаб, База канали 13 февраль куни кечқурун украиналиклар «Шинник» клуби бошлиғидан Украина мадҳиясини куйлашни талаб қилгани, шундан сўнг, у кўчага чиқиб «орани очиқ қилишни» таклиф этгани ҳақида ёзган. Каналнинг маълум қилишича, меҳмонхона вакиллари орага тушиб, жанжалнинг олдини олган.

Кейинроқ База воқеа бошқача бўлганини, украиналиклар руслардан нега Россия режимига қарши норозиликка чиқмаганлигини сўраганидан кейин жанжал юз берганини ёзган. Шундан сўнг ҳар иккала томон лифтда муштлашиб кетган. Вазиятга полиция аралашиб, можарони тўхтатган.

Украина манбалари воқеалар бошқача ривож олганини ёзди. «Зеркало Недели» газетасининг ёзишича, россиялик футболчи маст ҳолда меҳмонхона ходимларига қўпол муносабатда бўлган, украиналиклар унга танбеҳ берганидан кейин жанжал бошланиб кетган.

Россиянинг Маш телеграм канали муштлашувда тўрт нафар россиялик спортчи жароҳатлангани ҳақида хабар берди. Футболчилар шифокор кўригидан ўтган. Улардан бирининг лаби кесилган, бошқасининг бармоғи цинган, яна бирининг қовурғаси цингани гумон қилинмоқда. Украиналик спортчиларнинг жароҳат олгани ҳақида маълумотлар йўқ.

Ҳуқуқ-тартибот идоралари ходимлари жанжал такрорланмаслиги учун меҳмонхонада навбатчилик қилган. «ТАСС» хабарига кўра, футболчилар полицияга ариза ёзмасликка қарор қилишган. Яқин келажакда жамоалар турли меҳмонхоналарга жойлаштирилади.

«РИА Новости» хабарига кўра, «Шинник» клуби меҳмонхона маъмуриятидан ўз футболчиларини украиналик футболчилар билан бирга жойлаштирмасликни олдиндан сўраган, бироқ 6 февраль куни содир бўлган зилзила туфайли Туркия меҳмонхоналарида жой етарли эмаслиги айтилган.

• Футбол
• Муштлашув
• Россия
• Украина